【Void心事台R007】

我有抑鬱 男友只會更傷害我

幾年前讀書已經有抑鬱，當時有定時見學校心理輔導，情況有好轉，久而久之了解到情緒病係點，知道點樣幫到自己。畢業之後岀嚟做嘢一直都冇事，直到上年開始失業、社會問題、疫情好多好多嘢令抑鬱間唔中復發。

問題就嚟喇，我知道男朋友好錫我，係我失業期間都好支持我，甚至話養埋我(當然我唔想，女仔都要有工作能力😒千祈唔好因為一句養你就大安旨意。)

佢係我哋一齊之前都知道我曾經有抑鬱，一開始拍拖都有正面同佢講過問過，如果唔想可以分手，免之後痛苦，但佢堅持話”唔開始都開始左啦“，然後叫我睇醫生，但我真係好唔想睇醫生就拒絕左。之後佢都幾次叫我睇，我都拒絕曬。(其實我都有期望佢自己了解下情緒病係點，點幫到我，睇吓void就知do & don’t😉)

每次我喊，心情好差既時候，佢都淨係識講唔好喊啦，諗啲開心嘢啦，甚至係我萬里滔滔話想死既時候，佢話”你真係好自私，有冇諗過我啊？有冇諗過其他人？” 個刻真係即刻唔想自殺，想殺人了。

最近一次因為食團年飯，日日都見好多人，突然間乜飯都食完，朝早起身得翻自己一個就開始嚟料，乜人都唔想覆，唔想講嘢，不停喊不停喊，同自己講”喊吓啦，喊一陣冇事了”。

我都知對唔住男朋友既，突然間乜都唔應，直到佢放工夜晚打比我，問我做乜，又係叫我唔好喊，完全唔記得左我會有抑鬱...佢覺得我好翻就係好翻，唔會復發。然後我又同佢講我抑鬱，佢第一句就係”去睇醫生啦”，”諗啲開心嘢啦”，本來都只係喊，聽到呢啲說話個心真係好痛，更加停唔到眼淚，我send左void既”抑鬱症最怕聽到的話”比佢。佢依家唔敢亂講嘢，直接講唔知點氹我。(但都係未follow void🙄)

究竟我仲同唔同佢講，定自己解決就算......😞

小編的話：

原來我地的Post可以俾到小小幫助你好感動 🥺我地會繼續努力，希望可以繼續俾到小小支持你；我認為你是一個聰明的女孩，特別同意你果句”千祈唔好因為男朋友話養你就大安旨意”，你知道自己需要甚麼，欠缺甚麼，所以可能好多時會因為現實落差而產生失落感，給小小時間自己，還有身邊的人，可能男朋友未係好識用你舒服的方式安慰自己，但他在乎你也是事實，坦白跟他說你需要甚麼，不想要甚麼，他只要有心，慢慢一定會有改善的：）
(他不想Follow我們也很小事了🙈最重要你可以和他好好溝通。）

小編的話為小編個人回應；
回應不涉及任何治療、診斷；如有不同想法，一切以你為準。

***投稿者有留下驗證碼，可能會有續集和投稿回應
***小編查證網上無重覆內容
--------------------------------------

每一個心聲也值得被重視；
你會想分享你的心事給大家嗎？
歡迎大家LinkIn Bio投稿【Void心事台】
期待收到大家的故事 ☺️

***投稿內容不代表本台立場
***切勿重覆投稿
***暫時每天出稿有限，投稿後請耐心等待🙏🏻

#Void心事台 #抑鬱症 #抑鬱 #抑郁症 #憂鬱症 #憂鬱 #理解 #聆聽 #心理健康 #心理健康不能等 #香港情侶 #香港愛情故事 #情侶 #couple #愛情故事 #愛情 #lovestory

2020，時窮節乃現。
2021，係一個更加大嘅考驗。

Reflection呢啲嘢唔係寫俾人睇，係寫比自己睇，幫自己做一個思想記錄。

我唔係一個鍾意寫回顧的人，曾經以為自己覺悟大家到唔需要同人交代人生，不過2020年實在太特別，要破例講。蘋果講過幾句，而家講長少少

整體來講，這10年我的人生過得非常精彩，起跌無常，亦有好多古怪嘅經歷，識埋好多古怪嘅人。以我這樣普通出生的階層是不應有這樣的認知圖像和人生軌跡，不過Anyway，我實在太幸運了......假如30歲前不幸急病埋單落地獄，也不枉，由進入大學，到畢業出來工作，冇一天白過。是的，我隨時可以去死，只要唔痛的話

我日常嘅工作係包括寫稿，玩社交媒體、炒股票、管下公司一啲行政瑣碎野、見人會客、睇吓自己啲項目、撩人傾偈、發下牛痘，睇吓書，總之就係個Slash。間中都會有啲突發情況，就以今日為例......

今朝我收到個電話。曾經我撮合了一個合作。本來以為自己做咗件好事，點知合作雙方有一啲不愉快嘅事件，最尾驚動到要搵社團人士，然後，我就要排難解紛。

本來個合作都幾好，佢哋都搵咗過千萬，明明贏錢應該開心，但係分贓永遠有拗撬，反面好簡單，商業世界就係咁脆弱。佢哋會搵我，證明我喺江湖上面都有少少信用，出嚟行都要講吓道義嘅，有時。

下晝冇食飯，同一個大型基金經理傾美國SPAC。

佢哋好有遠見，喺香港最早一批去美國搞SPAC借殼上市的團隊。唔使理係啲咩，唔重要，係一啲最新金融工具，佔咗美國IPO四成，不過香港金融機構比較濕鳩，啲商業機會流晒去美國。總之，我嘅下晝就咁過

中間搭車時間我就覆緊WhatsApp，搞下公司野，出下稿，睇吓社交媒體，落盤睇吓股票咁

今晚七點我一個讀撚book咗酒店staycation，叫room service食今日第一餐飯，然後開始處理今個學期碩士要做嘅paper。攰左成日，而家一個人係間房浸緊浴，寫緊呢篇野

呢一年我嘅人生大致就係咁，比起一年前更忙碌，更商業，趁個人體力應付得到，記憶力同學習能力未大幅下滑嘅時候，好貪心想成就一啲野，好貪心想學多一啲野

呢兩年如果你個人有良心有少少良知，好難過得快樂。擺脫心理壓力同精神抑鬱嘅最佳方法，就係令自己更加忙，更加沉醉喺金錢，用盡自己嘅體力心神。

同埋，我想做一個實驗，證明唔需要奶，唔需要放棄良心價值，人都可以活得好好，成就到一啲嘢出嚟

呢兩年我書讀得唔係咁好，冇乜心神去鑽研學問，因為亂世修行嘅得着，比起我神交古人得着更多。

以前我覺得意識形態係一啲政治立場嘅延伸，例如你係黃色，佢係藍色；你係民主，佢係極權；你支持自由市場，佢支持中央集權；你係左，佢係右

我覺得more than that，因為人嘅心理認知應該有重機制，會令到我哋自圓其說，自我肯定。意識形態嘅組成係有呢個部份。正如有啲人會覺得嗰班曱甴暴徒一定係人生失敗者，買唔到樓，上唔到位，所以先至反政府擲汽油彈。我唔同意，但係佢哋睇唔到另一啲原因，受制於自己嘅認知圖像。

又例如，會有啲人覺得個「政府好衰，咁你可以做啲咩啫，你只能夠服從」佢哋係認知到現實係出現咗一啲唔公平嘅狀況，例如721 ，但係佢哋選擇拒絕接受現實，嘗試搵個方法接受犬儒，認命，合理化自己。

我要繼續活得好，成就一啲野。除咗心態之外，亦係想證明唔需要放棄人生價值，放棄良知，依然生存到。嗱，當然唔會搵到大錢，好似我咁，做金融一定係要親建制先至可以搵到大錢，但係起碼我養得起自己，活得有尊嚴；開始有啲人會覺得，我係一個有趣、值得認識交朋友嘅人物，唔係路人甲。我未到30歲，睇住好多同輩朋友賴共暗共，做警察加入建制，但係暫時呢一刻，我諗我活得比好多奶共嘅90後更加精彩，更加有自尊，但又餓唔死

以前啲人成日話歷史係由勝利者書寫，時代改變了，檔案記錄方式係進步咗，有啲嘢係一世都唔會磨滅到。對錯嘅詮釋權不在於得勢的一方，亦都唔需要在乎勝利者點樣蓋棺定論我哋。我哋呢一刻做我自己，堅持信仰嘅價值，咁就ok了。

呢兩年我嘅名多咗喺媒體出現，對於作家嘅我來講，當然係好事。盧斯達嘅訪問將我寫得好好，文人馮睎乾、李怡文字提及過我，呢啲都值得攞嚟打飛機。

今年我俾人認知到嘅事大體有三樣，買壹傳媒嘅股票買到外國媒體都報道，丁葉劉，同埋玩Mewe玩到上國際傳媒

呢三樣嘢都有啲九唔搭八同我本身嘅專業毫不相干，不過既然人生咁有趣，做作家唔介意多啲人認識，嘻嘻

好多人將公開讚葉劉睇成娛樂效果，其實冇你諗到咁簡單，雖然童心未泯，但畢竟人成熟咗少少，做事會諗多幾步。港台同葉劉關係不特別好，葉劉下屬曾經公開叫人寄信批鬥利君雅，間接令到佢延長試用期。如果我當時唔咁做，港台分分鐘又中多一次核彈，雖然我成為笑話，但亦spin走一個潛在大危機。過程中，我了解自己更多，原來我都可以諗到呢一啲細節，有深謀遠慮，亦都懂得臨時應變

事業上都唔錯。今年股票回報幾好，正如大部份人嘅回報都非常之好，其中有一隻小基金贏咗超過一倍。我亦都想將而家自己嘅工作再規模化多啲，接近私募基金結構，而家努力當中。

自己曾經投資嘅業務都搵到融資窗口，我亦替佢哋高興。逆境下搵到錢，亦順利做到部份轉型，我自己退居了，減少參與管理

時窮節乃現，如果我好似周柏豪咁變節，分分鐘榮華富貴享之不盡。小確幸是好東西，唔需要追求太多物質慾望，好簡單越快樂就可以細水長流。正如我同我契女玩，老點佢搣爛本書，原來都係一件幾開心幾簡單嘅事。錢真係唔需要搵太多，追求卓越成就更加啱我而家呢種心境。最文藝嘅人我認識，政治人社會賢達我都認識，萬億身家嘅老闆係我讀者，咁又點？

有閑錢餘力，不如幫多啲身邊嘅人，我成立嘅自由人獎學金已經派咗30幾萬，下一年都會繼續幫有需要嘅中大同學仔。我係呢一世都唔會再相信任何慈善機構，時窮節乃現，上年香港出現人道危機嘅時候，佢哋袖手旁觀。經濟比較差，小弟有餘力已經盡量聘請大學同路part-time intern。做呢啲小恩小惠都改變唔到我係一個仆街冚家剷嘅本質，死咗我一定落地獄，唯有盡量令自己良心好過少少，做一個善良啲啲嘅仆街冚家剷。

我人際關係亦都好撲朔迷離，整體來講都算幾多朋友，大家唔會覺得認識我係一個包袱負累，多咗人用「渾水嘅朋友」來做自我介紹

鍾意我嘅人都幾鍾意我，憎我嘅人都幾憎我，有時都憎得幾無厘頭，例如恨屋及烏，即係我識某啲人，所以佢憎我啲朋友嘅時候都會憎埋我一份。呢啲真係唔講道理，好在都係佔少數。朋友太多，呢啲我處理唔到。始終係商業世界生存，我有少少世界仔，公害唔怕講，但係私事處理盡量世故，減少參與別人恩怨。教主黃毓民食飯都咁講我：「兆祺，你搵到錢，唔好咁小寶」唔關心人哋爭執嘅來龍去脈，係保存友誼嘅最佳方法，何況我咁Q忙，都有50幾人跟我搵食，自顧不暇。能力範圍做到，我會繼續對朋友好啲。

呢一年，我更加認識我自己，搵返我自己，同埋了解我自己。

下一年，想認真做多啲運動，同埋睇返多啲書，再讀多個學位，趁我40歲移民台灣之前，盡量將香港最好嘅東西學晒過嚟。事業上繼續平穩發展，慢慢諗多啲新計劃。成日都滿腹大計，但有時未必做到，我好高騖遠，有啲計劃淨係做到一半都已經唔錯，所以有時定計劃都不妨定得比較誇張啲

2021年一定比今年更加難過，要學習愛自己多啲，唔好介意中二病，多點欣賞自己，獎勵自己

寫咗咁多嘢，係時候學下蕭若元，賣下廣告。請支持訂閱，最近我不停改進我嘅產品，新加咗好多服務，多謝貨金。我睇唔明情感消費，我淨係識商業運作，做好自己嘅產品，就係對顧客最好嘅責任

對抗霸權，比自己一個更自由嘅選擇，立即加入Mewe一齊傾偈。

Muddy Water渾水財經Channel
https://mewe.com/p/%25E6%25B8%25BE%25E6%25B0%25B4%25E8%25B2%25A1%25E7%25B6%2593channel

渾水財經Channel x Fortune Insight 獨家眾籌出版《港斃。港完：國際金融中心崩壞史》率先網上預訂：https://muddywater.fortuneinsight.com/web/

你的支持，將會在香港金融史上烙下痕跡。

至於想知多點制裁對國際金融、香港個市的影響，可以訂閱我《金融經濟精神食糧》逢一、三、四出刊登專業財金分析文章，另設特別環節：每週解答觀眾問題、100萬模擬倉投資部署和每日金融財經Podcast，幫你補補腦

https://prime.fortuneinsight.com/web/muddydirtywater

每日金融Podcast、深度金融文章、外聘國際關係專家文章內容、特選國際刊物分析、每月閲讀企劃、平民化A I大數據分析和自己人群組互動，盡在Patreon:

https://www.patreon.com/muddywaterfinance

之前出咗一篇文章，教人開「終極太空號碼」（virtual number），我見有兩名讀者喺《蘋果．果籽》寫評語，我逐一回應：

一，寫呢篇文章，我開咗兩個 Skype 號碼，但試咗好多次，都接收唔到服務的驗證碼，也就喪失了開號的目的。

二，就算 Skype 號碼可以收短訊，但每個月要比差唔多$50港幣去維持，一年就要比$600，長期用就要幾千蚊，計落唔係好值得。最重要係，根本就接收唔到服務的短訊驗證碼。

三，我買咗一張美國電話SIM卡，可以喺香港接收到美國短訊，但問題係呢一張SIM卡萬一唔見咗，係無法補領，會喪失個號碼，而且喺香港收SMS是經CSL嘅SMS gateway，同我想做嘅「太空號碼」仍然有啲距離。

四，我自己長期有一個虛擬電話號碼，係Google Voice出品，覺得好好用。但係問題係：

五，Google不停收緊申請Google Voice號碼嘅條件，即使你有美國伺服器嘅VPN，用美國IP去連接，同時有實體美國SIM號碼收驗證短訊，又或者用網上其他專門用SIM卡驗證短訊嘅服務，都係失敗。

六，網上關於開啟Google Voice號碼申請嘅教學一大堆，有啲睇落相對容易嘅方法，但去到最後，會喺你申請咗號碼之後，個號碼會消失。

七，後來我確實成功申請到Google Voice，為咗做測試同寫文，甚至因此獲得額外三個虛擬Google Voice號碼。而前前後後，我有六至七個美國號碼。

八，問題係，而家喺香港成功申請美國Google Voice嘅方法，存在大量「灰色地帶」，我同《蘋果．果籽》嘅編輯團隊傾過，我覺得喺《蘋果》介紹呢啲方法，唔太合適。《蘋果》搵我去寫專欄，畀我好大嘅自由度，但我都要為佢哋負責，決定乜嘢適合寫，乜嘢唔適合寫。

九，有啲讀者可能會以為作者寫篇文章，寫幾多就等如我只知咁多，又或者一廂情願地認為自己比作者所知嘅多。留言裡提及兩個做法，無一個work。

十，寫文呢回事，我寫一步，自己往往做咗十步，前期花上大量時間及功夫去研究，但我唔一定要話晒畀你知嘅。

https://hk.appledaily.com/lifestyle/20200724/22CDAS4QAPMCXTESDWEAE7GAGU/
【網絡隱身】終極太空號碼 自製虛擬電話號碼隱身兼申請美國服務