風來了，伴著雨。錢晉仍然在通洲街公園的橋底坐著，右手握著畫筆，左手捧著畫紙，像一尊化石，一動也不動。

拾荒阿伯徑自走來，在錢晉身邊坐下，說：「後生仔，又畫唔出呀？」

「嗯。。。」錢晉還在沉思，沒料到老伯走來搭訕，支吾了半句。奇怪，怎麼老伯今天氣味不太難聞？剛洗澡了吧？

老伯坐得好端正，眼望遠方說：「早兩日有個女仔又係坐左响度好響，渣住部相機，不過似乎一張相都無影到。」

錢晉瞧著老伯，當日那位女子，大概就是冷峰吧。

他們總是近在咫尺，卻又遠在天邊。上次在咖啡廳有表白的機會吧？但她需要那個人，那人能給她的，自己不能。

老伯斜睨著錢晉，輕輕的說：「你地後生仔女既事，我其實無乜興趣，但見你地日呆夜呆，真係頂你地唔順，，，」

錢晉靜靜的聽著，不發一言。

「同你講個故仔丫。。。我後生果陣，，，」

每個人都有自己的故事。。。

原來拾荒阿伯年少時已經認識拾荒婆婆了，他說好喜歡她無憂無慮的笑容，看了好幾十年也看不膩。他說她好易哄，一個好白痴的笑話也足以讓她笑得合不攏嘴。上次砌那個花環，婆婆笑了半天。

大概五十多年前，老伯當時書讀得不多，未有穏定收入，沒有積蓄，一事無成。雖然已經深愛著她，但那種想要愛她又不能認同自己的愁緒，日夜折騰。

有一天，她笑得彎下身來，抬頭時晶瑩的雙眼瞇成兩隻彎月，問：「我們七老八十的時候，你還會哄我笑嗎？」

「我是吟遊詩人，老了不知身在何方。」老伯當時這樣回答。他認為自己不可能給她幸福，不敢許下任何承諾。

然後，他成為了浪子，吟遊四海。但無論他飄泊何方，她的笑容都揮之不去。

他流浪歐洲時，無意間買下了兩櫃傳統紅酒，到日本竟然大賣。他爭取成為獨家代理，十年後，他的紅酒暢銷全球，他將舊世界的酒重新推向了新世界。

那時他未到四十歲，帶著逾億生意、千萬財產回到香港，看見她和她的丈夫，在廟街擺賣臭豆腐。

他和她雙眼一接觸，就知道她很久很久沒有再笑。她眼眸裡只有憂傷，曾經牽腸掛肚的笑面，不再重現。

他不能哮叫出的那種心痛，比當年狠狠拋下她出去流浪更傷、更痛。

「後生仔，無悶親你丫嘛？你睇吓果邊朵花幾靚！如果你要等天晴先帶佢嚟睇，可能朵花已經凋謝。而家雖然落緊雨，但我地坐响橋底都望到丫。」

錢晉怔怔望著老伯，等著聽他繼續他們未完的故事。

老伯當年心裡極度悔恨內疚，終日借酒消愁。此後無心打理紅酒業務，自顧自的飲光了所有紅酒。十年後終於破產收場，再度流浪，卻是淪落街頭。

在街角風餐露宿了又十年，竟然在通洲街公園重遇她。原來她丈夫已經癌病去世。

他更加內疚。

再一次的重遇，他沒有好好做人，潦倒半生。那時他已經六十多歲。

他坐在通洲街公園，下著雨，看到雨中的花，，，

「雨中看牡丹

東風未放曉泥乾
紅藥花開不耐寒
待得天晴花亦老
不如攜手雨中看

唐。竇梁賓」

拾荒老伯走了，剩下錢晉一個人，而錢晉只剩下畫筆，但他早已決定墨盡了就不會再換。

風停住，雨靜了，一切都為錢晉準備妥當。

這是一通他們最長的一次通話。

錢晉向冷峰表白。

冒著只能說一次的決心
他向她
透露了壽域同證的情真
表達了華堂皆老的情感

他知道說話也許只能說一次
他把心一橫當作最後一次
幾乎窒息的止住呼吸
娓娓道來的
情感是多麼真摯

她的聲音也許最後聽一次
但他很想很再看她一次
幾乎缺堤似的江河
悠悠放輕說
時光是這麼精緻

愛總要及時
愛要讓人知
一場峰前飛落的雨
雁字回時
哭有時
笑有時

他們
及時

二零一三
秋分

回憶

琴晚係房到見到細佬偷偷地冒阿媽個名去簽回條，我行埋去拎起張回條黎睇，對我黎講，回條係我人生階段之中已經變左一件歷史遺物，以後既日子無可能再出現或者應用係我身上，所以突然間有所感觸。

諗下諗，我開部電腦，去左Xanga睇下以前所寫既日記，由於太耐無上過，已經唔多記得個Account同密碼係咩，要撞左好多次密碼先入到。睇住五，六年前既中學生活，每一日都多字到好似寫論文咁，差唔多食過咩飯屙過咩屎攪過咩gag，邊個人做左柒野都一一寫低，依家睇返，文字入面就好似一條活生生既生活短片，腦海出現哂所有以前既畫面，好多已經唔記得左既人同事都係Xanga到記返起，依一刻我真係好興幸自己當日既努力同恆心，將我既回憶一一記低落黎。

最重要既係，Xanga就係我既回憶錄，自傳。你會見到以前幼稚，唔成熟既你，整到Xanga有咁靚得咁靚，又播哂歌咁，又叫人係咁留Comment，打字好多表情符號，好多粗口，好多歌詞，好多火星文，什至得一兩句感性說話就無，例如:

Wednesday, February 01, 2012

我心很痛.....但我好開心。

Public - 10:31 AM - 2 views - add eprops - add comments - edit it - email it

依家睇返都唔明個日發生左咩事。咩撚野心好痛但又好開心? 姐係心情仍然很爛，但仍覺燦爛!? 不過依家睇返都有D唔好意思，心入面仲笑住講左一句:『咩我以前咁on9架?』睇住自己慢慢轉變，見證住自己既成長，感覺真係好特別。

講起Xanga，對於中學雞黎講真係一件非常又愛又恨既工具。當你有心儀既對像或者『女神』既時侯，你會好似偷窺佬咁，偷偷地睇佢Xanga，如果幸運既話，可以見到女神Post相，你就會好開心，完全符合女神只可遠觀而不可_ _ _既道理。如果女神唔想比人偷睇佢既Xanga，佢可以Set 密碼同埋整一個觀看紀錄，你一定要登入AC先可以睇到。不過道高一尺，魔高一丈，我地可以透過Fire fox既原始檔編碼，可以查到女神既密碼，又可以用神級既發明，偷窺佬既恩物『Xangaspy』去匿名進入女神既Xanga。

如果你同一個女仔曖味緊既時侯，大家都會猜測緊對方既愛意"佢對我有冇意思呢?" "點解依排佢對我冷淡左既?" "佢好耐無搵我啦，佢做緊咩呢?"。以上答案，全部可以係Xanga搵到，但答案唔會咁明顯Show比你睇，因為每個寫手都變身一個編碼曲線達人，要表現得含蓄，感性得黎又帶點理性，你就要好似神探玩摩斯密碼一樣，係篇Xanga搵出暗示/明喻/借喻/曲線/直線既真正意思，真係又刺激又好玩。

可惜時代急速發展，好多回憶既野都一一被淘汰。當年ICQ，今日既Msn，都已經被淘汰。取而代之既係Skype，Facebook，Whatsapp。無論你幾唔鐘意依堆新野又好，幾留戀以前既野又好，你都必須跟住潮流同時代發展既步伐，人係群體動物，無可能獨立生存。

比我揀，我寧願玩死Msn，都唔想用Whatsapp。個種日日坐係電腦面前，期待住『女神』既Online，一日不傾，如隔三秋，訓又訓唔著，食唔安，坐唔樂。上網識女仔既時侯，你不斷試探對方比相你，個種期待同刺激既感覺非常之正，係靚女既話即刻加多幾錢肉緊同對方傾，係豬既話，即刻係部電腦面前大叫:『屌!』之後Del + Block 對方係例行公事啦!? 唔洗人教吧?!

以前有人話為左打機同屋企D細佬妹搶電腦用，其實係想同心儀既人傾多D，玩下Msn既寶石方塊，旋轉泡泡球，雖然唔係咩大製作既Game，但同心儀既人嘻嘻哈哈玩下低能Game真係幾開心既事。因為MSN幾乎一定要用電腦先玩到，你玩少一日電腦，你就見少一日女神。值得令人回味既係，你可以睇住鐘意既人"Online" "offline"，講拜拜，講早抖，人地真係做比你睇，真真正正既熜電腦offline訓覺。

你老味個Whatsapp，就一一破壞哂以上所有野，就係個最後上線時間都玩死好多人。人人一機在手，已經無哂個種等人上線既期待，反而衝生左好多問題出黎。

『早抖啦^^BB!拜拜!』

『拜拜^^!』

過左幾粒鐘之後。

『喂!!又話訓既! 做咩見你最後上線時間仲夜左架?』

之後又一堆做咩上線都唔覆我。對於唔想應，但上線已經暴露左我既狀態，唔應又唔得，應既話又唔可以太Hea，唔似得Msn咁，唔鐘意?!扮Offline囉! 太極端? 咁咪整個離開/忙碌中，人地見到都會知難而退。有時侯.....傾計姐，唔洗咁Chur呀，比D空間大家啦!?

有人話:『你將Xanga既野，係Facebook到打咪得囉!都一樣姐!』

其實絕對唔一樣，Facebook只係圍內既人自High既野，如果將Xanga個套放係facebook，廢事比人話煩膠，博上位，咩點解要逼我睇你既野，無興趣知你既事，博Like等等。所以我依家用Facebook都係為左拎資訊同睇下人地既相就無咩其他用途，咩擴大人與人之間既關係同溝通? Bull shit! 不過方便又真係既，好似上到大學，做咩Project都開Group，但完左Project之後，就好似叫完雞一樣，完事。個Group就變得死寂，大家既關係都到此為止。

不過講咁多仲咩丫，可能十幾廿幾年後，又有人打返篇文" 都係當年Facebook同Whatsapp最好"，其實都係時代既改變，但見到身邊對得耐又有回憶又有感情既野都一一被淘汰，忍唔住有D感觸姐，最無奈既係，依樣野你係最鐘意，但你無得挽留，無得改變，只能默默跟住時代既步伐，人云亦云，追隨大隊，將依堆珍貴既回憶一一埋藏。

真係忍唔住好似以前中學雞咁，打返句歌詞感性一下先

" 誰得到過 願放手 曾精彩過 願挽留
年年月月逝去越是覺得深愛 『你』 "