《無異之局》荒村異聞（四）
　　
一聽到「吞噬異地」四個字，無二即刻露出一個若有所思嘅表情。
　
「如果我嘅線報冇錯，半年前嘅尾東樓事件你應該係在場。」凌永岳用幾確定嘅語氣同無二講：「作為親身面對過狄陀嘅人，你肯定比我更加清楚佢想點。」
　
「嗯……加埋你呢個訊息，答案可以話十不離九。」無二點咗下頭，然後轉頭望向我，「但我嘅助手比較鈍，而且係呢行嘅初哥……所以最好俾少少時間我同佢解釋下。」
　
「隨便。」凌永岳並冇拒絕，「就當確認大家嘅情報係咪一致。」
　
「阿聰，首先你要知道一個基本概念──就係幾乎每個『異地』都係伴隨住一個或者以上嘅『結界』。然後，你應該仲記得我講過結界分成三大類？」無二問。
　
「吓？」我好意外，「邊有……每次提起結界嘅話題你都只係叫我之後請教杏姐……」
　
凌永岳聽完我講之後偷笑咗一下，無二就借咳掩飾尷尬然後接住講落去：
　
「咁你而家要細心聽清楚。結界總共分成三類，首先係最常見嘅『防禦型結界』──主要用嚟保護同隱藏一個區域，唔俾外人發現同破壞。之前去過嘅『極樂園』、頭先提到嘅『惡夢島』、仲有我哋而家身處嘅『城寨』都係俾一層防禦型結界保護住。」
　
「順帶一提……杏姐就係防禦型結界嘅專家。」凌永岳插嘴講：「佢三年前嚟過呢度幫我哋做檢查，所以先會知道密碼嘅變化模式。」
　
檢查……感覺成件事突然變得非常科學。
　
＝＝＝＝＝＝＝＝＝
另一篇長故《扮工鬥室》Patreon 連載中！歡迎訂閱支持！
https://www.patreon.com/echoofheart
　
《荒村異聞》連載中：
https://www.facebook.com/pg/Echo.of.Heart/photos/?tab=album&album_id=2067100083421797&__tn__=-UC-R
　
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
　
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告】《無異之初》、《無異之地》各大書局有售！
＝＝＝＝＝＝＝＝＝
　　
「第二類係『攻擊型結界』，呢類結界存在嘅主要目的係用嚟傷害人類，可以係身體、亦可以係精神同靈魂。再犀利啲嘅，直程可以摧毀結界裡面嘅任何事物。最後係『特殊型結界』──譬如用嚟傳送、減慢時間、單純隱藏一兩個人嘅迷你結界、仲有啱啱提到嘅『斷緣結界』……呢啲通通都係歸納喺呢類。聽到呢度，你應該知道『尾東樓』嗰次係屬於邊一類啦？」
　
「應該……係攻擊型？」我唔敢肯定咁估。
　
「正確，而且『D-code』仲係屬於最邪惡、威力最強大嘅一種。」無二解釋：「雖然狄陀喺『尾東樓』創造出嚟嘅係假貨，同真版程度差好遠，亦都冇辦法達成任何願望……但照而家嘅情況睇，佢當時已經試到佢想試嘅嘢──就係『吞噬』能力。」
　
「『吞噬』能力？」
　
「呢度不如等我解釋。」凌永岳拎起台上面張地圖，用藍筆喺九龍城嘅位置畫咗一個圓圈，「你當呢個藍圈係『城寨』嘅『防禦型結界』……假設狄陀喺外圍創造一個威力更強大嘅『攻擊型結界』。」佢再用紅筆畫一個包圍住藍圈嘅紅圈，「咁一段時間之後就可以將成個『城寨』吞噬，從而將裡面所有能量據為己有。」
　
「即係話……佢而家係外國就係做緊呢件事？」我問。
　
「睇嚟你終於跟上進度。」無二滿意咁講。
　
「但你之前都提過香港有好多『異地』，點解佢偏偏要選擇過外國？」我再問。
　
「其實原因就喺晒呢間房裡面。」凌永岳回應：「第一，佢唔想喺實力增強到自己滿意之前同無二硬碰，留喺香港遲早係會短兵相接。」
　
「好合理……」無二點咗下頭，「但佢都講過，下次見面就係決勝負嘅時候……」
　
「第二，就係佢同你哋一樣都收到風聲，知道我手上有『斷緣玉』。」凌永岳接住講：「既然仇家有一件可以徹底消滅佢嘅神器，佢當然唔敢輕舉妄動。」
　
「到我有樣嘢幾好奇……點解你會對狄陀嘅一舉一動咁清楚？熟到就好似佢肚裡面條蟲咁。」
　
「身為復仇者……呢個係基本義務。」凌永岳回應：「但為咗攞到呢啲情報，過程都唔係完全冇代價……」
　
講到呢度，我從佢銳利嘅眼神裡面睇到渴望復仇嘅決心……呢一刻，我突然有個問題想問清楚。
　
「凌……少幫主，我仲有樣嘢想問。」
　
「你哋叫我岳少就得，叫其他名反而唔係好慣。」
　
「好，岳少，我聽無二講令尊就係俾狄陀殺死……到底當年係發生咗咩事？係咪都係因為狄陀嘅詛咒？」
　
「唔係，我爸做人鼎天立地，點會俾隻惡魔誘惑到。」岳少搖搖頭，「我爸係為咗守護『城寨幫』而死。二十年前，狄陀假扮成一個流浪旅客希望加入『城寨幫』，雖然口口聲聲話想用佢嘅能力振興幫會，但其實暗中想奪取『城寨』龍脈嘅能量，同搶走兩件傳幫之寶。」
　
雖然冇講明，但其中一樣應該就係『斷緣玉』吧。
　
「雖然我爸及時識穿咗佢嘅陰謀，但當時陸孝虎唔喺度，所以根本冇人有能力對付到佢。所以我爸暗中派人將兩件傳幫之寶送走……然後帶住十個同佢出生入死廿幾年嘅兄弟一齊對付佢。」岳少握緊拳頭，「就算明知必敗無疑，佢哋都冇逃避……奮戰到最後一刻。死戰過後，雖然冇人生還……但佢哋成功趕走咗狄陀，仲令佢元氣大傷，足足十幾年冇辦法再作惡。」
　
雖然只係口述，但確實聽得出係一個悲壯嘅故事。
　
「到近呢幾年佢再次現身，我哋幫會當然不斷派人追蹤佢……然後就係一開始所講咁，佢而家不斷遊走世界各地吞噬『異地』增加實力。」
　
「但佢作為一個狡猾嘅惡魔，我唔信佢完全冇其他行動。」無二回應。
　
「你咁諗係冇錯……而且好可能已經進行緊。」今次到凌永岳露出若有所思嘅表情，「最近呢一年，我哋『城寨』裡面都發生咗好多怪事，而且……」
　
佢講到一半突然停落嚟盯住大門方向。無二都即刻有所反應，即刻拉住我行去房間角落。
　
「唔好出聲。」無二壓低聲講：「有人喺外面走廊行緊過嚟。」
　
「係偷聽？」我細聲問。
　
「殊。」
　
大約十秒後，大門先傳嚟兩下拍門聲，繼而有把陌生男聲講：
　
「我見到房裡面有燈……請問岳少爺係咪喺度？」
　
岳少先望咗我哋呢邊一眼，然後接住回應：「嗯，董叔叔你咁夜仲喺度嘅？」
　
「唉，咪關於紙商件事囉，頭先田老闆又威脅話唔俾佢加價就會退出商會……你而家方唔方便傾兩句？」
　
我注意到旁邊嘅無二搖咗下頭，岳少望見之後講：「我啱啱攀完石有啲攰，有咩不如留返聽朝先傾？」
　
「既然係咁，我都唔打搞你啦……早啲休息。」語畢，隨即聽到有腳步聲喺房間外面走過。
　
等咗大約半分鐘之後，岳少先至開聲問無二：「你覺得佢注唔注意到你哋？」
　
「單靠氣息應該係好難。」無二回應：「但佢作為一等一等嘅『拷問師』，可能憑頭先幾句說話就已經注意到唔妥。」
　
「咁睇嚟呢次對話要結束喇。」岳少講：「呢期『城寨幫』入面嘅派系鬥爭越嚟越激烈，我都唔想再增加不確定因素……」
　
「呢個就係你話要半個月嘅原因？」無二問。
　
「冇錯，」凌永岳行到門前開門，確認外面冇動靜之後再講：「咁我都唔送你哋喇……半個月後再見喇。」
　
返去嘅過程中，無二慢慢解釋埋頭先未提到嘅細節。
　
「嗰兩個傳幫之寶其中一個就係『斷緣玉』，佢哋當時明知冇辦法打低狄陀，咁當然唔會拎去用……否則只會白白送俾敵人。至於另一個，老實講我都唔清楚。」
　
「咁頭先拍門嗰位董叔叔呢？」
　
「佢叫董炎，我哋呢行非常出名嘅『拷問師』，當年亦係佢同岳少老豆合作重建『城寨』。自從岳少老豆死咗之後，佢就做咗足足十幾年代理幫主，直到岳少十八歲成年先至退落嚟。雖然表面話準備退休，但佢其實並冇真正放低權力，之後幾年凌氏同董氏兩個勢力不斷互相抗衡。為咗處理呢啲問題，佢應該而家都幾頭痛……」
　
「嗯，雖然佢年紀比我細，但我第一眼已經睇得出佢有好重負擔……」我回應。
　
「所以我先一直都唔鍾意聯群結黨。」講到呢度，正好車到嚟我屋企樓下，「總之，都係呢句喇……反正都等咗咁耐，唔差在多半個月。」
　
*
　
呢次會面之後幾日，我哋總算過返啲平常日子，無二除咗照約定教我隱藏氣息嘅方法，亦都叫我要多啲約如初出街。因為冇人知道最後一戰會幾時開始，亦都唔知到時會唔會出現咩意外。
　
轉眼間就過咗差唔多兩星期，就喺半個月約定前嗰一日……一件始料未及嘅事情發生了。
　
嗰日朝早，辦公室突然響起門鈴聲，係繼上次Cheryl嚟求助之後再一次有人上門。我如常去開門，見到門外面係一位著住深藍色唐裝，年約四十歲嘅男人。
　
「請問，無二先生同韋家聰先生喺唔喺度？」男人垂低頭問。
　
「喺度……我就係韋家聰。」
　
就喺下一刻，呢個男人緩緩抬起頭，用兇狠嘅眼神瞪實我，接住講：
　
「我今日係嚟幫凌少爺報仇。」
　
（待續）
　

呢集應該係最後解說回，大家好好消化下，下集正式開始加速了。下集暫定星期六同日。
　
另外再講～Patreon 已經正式開始有連載啦！長篇故事係《扮工鬥室》、集歡樂、恐怖、愛情於一身……會更加似我以前嘅風格，希望大家多多訂閱支持！
　
https://www.patreon.com/echoofheart
　
－－－－－－－－－－－－－－－－
　
【地方的無默媽資助計劃】（試行中）
　
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
　
Payme 連結：
https://payme.hsbc/echoofheart
　
轉數快 FPS ID：6065460
　
計畫緣由及詳細內容：
https://bit.ly/39b5Fuw
　
－－－－－－－－－－－－－－－－－
　
IG：echoofheart

［長假期前的高流灣］訊息量都幾大。任君演繹。睇你咩角度切入。

1. 最簡單嘅，咪「咁情勢都仲打邊爐」。但話我疫苗撚都好，我就唔係好有乜科學根據。話氣融膠定乜傳播，咁其實都係講同我一齊打嗰個啫。而講過好多次，打邊爐呢味嘢對我嚟講好神聖，我唔輕易同人打邊爐的。都話，上過床嘅女仔，一定多過同過我單邊打邊爐嘅女仔。咁反正我都係同埃汾太打，要感染嘅都唔爭在。

2. 況且，金融海嘯又好，反送中又好，肺炎都好，我都仲係維持住呢個每個星期五打邊爐嘅習慣（有冇人試過星期五晚約到我食飯？）。又話時話呢個傳統應該係上手女朋友（都十年前）留低，因為佢做報紙，但一般星期六放假，咁星期五放完工就齊齊打邊爐，然後就去我屋企（唔係點？）

3. 好啦，乜都睇錢嘅，咪睇價錢。嘩你兩條友食咁貴（或者，你兩條友食咁多嘢！）。咁高流灣的確係偏貴的，值唔值就好深，但埋單係偏貴。唔使同任何嘢比，我就自己同自己比。以我同囡囡嘅食量同叫法，去第度，應該唔使呢個價錢。留意仲免咗我加一（明啦）。

4. 而甚至我都仲未整條魚刺身—多數大時大節，囡囡生日呀，結婚周年呀，情人節呀，就醒下佢咁。好似坐監過節多個橙。拿，上次情人節咪有碟魚！（https://bit.ly/2yaal77）

5. 不過又話說回頭，雖然高流灣係貴，但亦唔係貴過我去其他地方好多。例如其實我近一兩年default 係去九龍城方榮記（呢排好似停業），咁因為我每次都叫嗰啲嘢，次次都係$992

6. 呀另外你留意到嘅，免汽水喎。拿，呢啲就「熟客」，但你咪撚拎住張相去R，走去話「做乜埃汾有我冇」。真係唔好咁low．而其實我從來冇出聲—大佬，有冇咁low呀。熟客呀，茶芥呀，送糖水呀，轉工人地buyout你呀，性交唔使用套（！）呀呢啲，梗係人地開口offer畀你嘛。你自己出聲問人就cheap晒啦

7. 事實係我並冇預約（＊），去到幫襯，呀飛哥已經十分開心咁嚟同我打個拳。老細，我應該2007年去緊喎。咁一路食呀飛哥十分殷切咁問我夠唔夠汽水，使唔使嚟多支—咁我就知佢會免費畀我啦。你估人地咁cheap叫你叫多幾支然後照收你錢甚至收你天價咩。

8. 拿，免汽水免加一呢啲，就熟客啦。但再講多十次，熟客，係人地認你嘅，唔係自認嘅，自認就變咗西客。

9. 而得罪講句，有時我都受之有愧（但當然唔會堅持畀正價咁志鵬（＊＊））。事實亦係，有一期就算飛哥在，其他人見到我都自然免汽水免加一。但後來又有收返，咁我當然都冇嘢，唔通又上網寫幾千字話唔公平。事實，近兩三年，我好似一個月都未必去到一次高流灣，所以「熟客」都受之有愧。當然人地免我我是接受的，但千萬唔好一個月都去唔到一次就R人地著數。（但其實我今年都去咗三次）

10. 不過原來，呢個世界真係好多西人，一年去幾次當自己熟客的。阿叔真係同朋友話自己係熟客嗰時，講緊係一個月去六七次！咁當然你可以話睇餐廳級數嘅，你一年去間米芝蓮三星幾次，照計都可以扮熟客。

11. 呀當然仲有，員工係飛嫂，正係老闆娘，飛嫂當然都認得我。但想講嘅係，嗰日嘅決定過程。咁星期四（星期五紅日嘛）當然要打邊爐，但方榮記收咗皮。咁再上個星期我去到九龍城係摸門釘嘅，去到油麻地再企圖食「滾德棧」又係早收。最後去咗佐敦嘅「淘園」，仲特登打定電話過去。

12. 咁「淘園」當然還不錯，以前食過，但當然亦有我唔鍾意嘅地方（主要係環境，同啲西客），否則一早我就個個星期去啦。

13. 重要嘅，都係嗰個書生嘅故事（https://bit.ly/3aXj0Zg）。「淘園」我就食咗啦，但好似關雲長（！）過五關斬六將咁，我聽到高流灣開返，當然就萬死不辭返去啦。至於點解係寶勒巷新店唔係山林道？純係因為再之前一晚我有事在尖沙咀，行經寶勒巷新店，見到開返，就知道咯。其實之前一晚我都見到飛哥，但我就在佢發現我之前就閃咗啦—鬼咩，又唔係幫襯。

14. 講咗咁多，純粹真係感情。咁啲友，買匯控都可以講感情嘅，我覺得食飯講感情好合理啫。雖然我連飛哥嘅電話都冇，亦都冇同佢合過照，但都係話晒幫襯咗十幾年，啲員工我都見咗十幾年（流失率相當低，可見呀飛哥個人幾好）。唔係話「飲食男女」嗰啲矯情嘅小店風情，但就真係去開有感情

15. 更何況，而家疫情之下，冇乜人幫襯。招呼係咪特別好？第度可能會，但打邊爐冇乜大分別啦。咁好在邊？好在可以靜靜地睇下文咯—係喎，我到而家都唔明點解香港人打邊爐咁撚嘈。

16. 但又不過幾殘酷嘅係，如果方榮記開返，可能我又會去返九龍城了。或者輪住一人一星期？未知。

17. 呢個年代嘅好處就係太多選擇，問題亦都係太多選擇。某程度上，我養成咗某啲習慣，就令到我個腦諗少啲嘢。江湖傳話呀教主又好，朱生又好，做乜成日著同一件衫？因為佢地根本懶諗著乜衫。同樣道理，我啲飲食其實「好有規律」—你見近幾個月都係咁：星期五我就去方榮記打邊爐，每次叫嗰$992嘅東西，單我都唔使睇。然後就去食合成糖水（退步中，我就快發火唔食了）。星期六你就見我在屋企附近食嗰間「VBT」，星期日你就見我外賣Donki海鮮飯然後自己加雞蛋加明太子太刺身（！）。好有規律。諗少好多嘢。

18. 太多選擇有時真係難搞。埃汾唔係食家，但勝在成日街出食飯（無飯家庭嘛）。以前都寫過，晉武帝司馬炎（司馬懿個孫，司馬昭個仔），「羊車望幸」（https://bit.ly/2VkJn4H）（都話埃汾啲文好有教育意義）。咩回事？因為太多女，自己都唔知有幾多，揀都唔識揀，唯有簡單啲，坐住架羊車，架車停去邊個間屋，佢就嗰晚去邊過夜。爽

19. 更絶，當然係有遊戲規則就有人game the system．於是，啲後宮為咗得寵，就自己門口撒鹽，甚至倒鹽水，因為羊鍾意呢啲味道。

20. 即係，以前就玩ICQ Random Chat咁（我一向覺得呢個係上世紀最偉大嘅發明，以色列對人類文明嘅唯一貢獻，條友應該拎諾貝爾和平獎）。但而家去到Tinder啦喎，就可以比錢做VIP會員提高個配對率了

21. 嚟緊可能仲會寫下餐廳。冇乜特別，冇收廣告，純係想寫。但只係嗰啲我真心鍾意，或者至少真心日日食嘅餐廳。我好撚佩服Open Rice嗰啲文妓（＊＊＊），明撚明平時話自己好日唔過九龍，但就去出篇石門（！）嘅食評。辛苦晒。

22. 預告我可能會寫雞功房，或者Patagonia 阿根廷牛扒。咁有加埃汾Personal Page 都知係埃汾常食嘅餐廳（兩間樓上樓下添），主要係……夠近。

23. 當然有餐廳嚟搵合作我都絶對歡迎，誰不愛錢。但又真係要埃汾自己鍾意嘅先得了。文妓都講feel，仲係咪文妓？

24. 而蘇花，係從來冇一間餐廳搵我嘅，很好。因為你見我打咗三千字，都冇講啲嘢好唔好食，連牛肉相都冇張。

（＊）雖然個個星期五打，但有時要就睇戲之類，所以時間難就。咁高流灣以前只係得出林道店，比較爆，walk in 有時冇，所以慢慢地我就幫襯第度。

（＊＊）志鵬嘛，《法外情》嘅劉德華，劉志鵬大狀。年輕，熱血，睇唔過眼行業嘅文化。被老行尊斥責佢「志鵬！你好難適應呢個社會」。呢個詞我地廿幾年前寫文成日用，而家唔注解冇人明

（＊＊＊）當然廣義嚟講涘汾都係文妓，但量變就造成質變嘛。陶傑夠文妓啦，但收得夠貴咪唔係妓。張愛玲話嘅。

——————————————-

版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。

Back To 2016! #MyFavouriteHits

My Favourite Hits 2016, The Top 10

第1位《方皓玟 - 你是你本身的傳奇》
作曲/填詞：方皓玟 編曲：伍仲衡 監製：許創基/Edmond Tsang

做歌手難，做獨立歌手更難，方皓玟花了十四年時間，由早年有大公司支持，去過台灣發展，到歌路形象過目即忘等階段嚟個大洗牌，成為如今有型有態度的創作歌手。兩年前一曲《分手總約在雨天》成功令小明走上頒獎台，亦曾成為小编的年度最愛，相隔兩年的跨年作品《你是你本身的傳奇》更加入屋，有感染力的旋律和互免的歌詞，食正受壓的香港人口味。歌曲收錄於《404 Not Found》唱片內，最值得一提的是專輯用了四年時間先上架，雖然慢工但真係出到細貨，全碟十首作品都係派台歌，而且十首都係由小明一手包辦曲詞，實屬創舉！大家可能會話十首歌曲沒有太大連貫，反而似一張精選唱片，不過細心留意，大碟名起用了《404 Not Found》已經一語道破，方皓玟就係如此有性格，不需用什麼類型去界定。她就是方皓玟，方皓玟又名小明，小明也是吳嘉欣，亦是樂壇中的異流，喜歡便唱，鍾意就做的唱作人。

第2位《Supper Moment - 風箏》
作曲/填詞：Supper Moment 編曲：Supper Moment / 阿Bert / Adrian Chan 監製：Adrian Chan

沒有大公司喺背後撐住嘅Supper Moment，三度入紙紅館失敗不打緊，轉戰會展連開兩埸十周年演唱會獲得空前成功，全場爆滿之餘，更令觀眾由頭企到落尾絕對唔野少，不得不佩服四子玩Live感染力強。樂隊一步一步由獨立樂團走到主流，由於工作量大增，而且面對經理人Gary的突然離世，SM喺音樂上的確有點亂章，欠缺系統地派了多款不同類型的作品上戰埸，幸好喺樂隊組合湧現嘅情況底下仍然企得穩，撐得住！其中演唱會主題曲《同一》和中途殺出的電影歌曲《沙燕之歌》各有可取，不過講到最令小編留下深刻印象，非跨年作《風箏》莫屬。《風箏》屬Supper Moment少有的情歌作品，易入口的Rock Ballad曲式，輕易討好樂迷，而且題材屬SM成員的親身經歷，那份真正的失戀傷痛特別容易流露出來，單係Intro已經有股攝人的力量，再加上結他獨奏部份SM花心思地起用兩支電結他模仿情侶吵架，還有Sunny少有的深情演繹，種種配合絕對有強化歌曲的作用，尾段好一句「只求不相見」，傷心欲絕！

第3位《JW王灝兒 - 多少年》
作曲：林家謙 作詞：陳詠謙 編曲：周錫漢/黃兆銘 監製：周錫漢

2016年有個特別現象，就係大批一線女歌手減產，楊千嬅、謝安琪、王菀之、吳雨霏和薛凱琪稍為退下火線，造就一位位新一代女聲崛起，如鄭欣宜、Gin Lee、AGA和方皓玟，還有由年頭衝到年尾的JW王灝兒。一年間JW打造了被譽為港女覺醒系列的「失戀三部曲」，三首為演唱會推加創作的跳舞作品，還有小品勵志之作《小故事》，合共七首派台歌曲，鑒於今時今日少了歌手出實體唱片，如果JW肯趕及年尾出碟的話，相信2016年至尊唱片大獎非她莫屬。同樣是苦情歌種，不過「失戀三部曲」的第二章《多少年》比第一章《矛盾一生》來得較內斂，不用聲嘶力竭地高呼失戀，把放底感情的悲傷淡淡然唱出，苦澀味濃，輕易討好女性歡心和性情中人，由於《矛盾一生》風頭一時無兩，蓋過內斂的《多少年》亦理所當然。

第4位《陳柏宇 - 沒有你，我什麼都不是》
作曲：Cousin Fung 作詞：林若寧 編曲：Edward Chan/Cousin Fung 監製：Edward Chan

獲封隱世歌手一整年的陳柏宇，適逢入行十周年，由年頭的音樂劇，到十周年演唱會，還有兩張專輯，工作量和作品也特別多，如頒勤工奬亦非他莫屬。正所謂「時勢做英雄」，在缺少大牌歌手和周柏豪零派台嘅優勢之下，的確是好好的時機推陳柏宇一把上頒獎台。《沒有你，我什麼都不是》年尾成功彈出，歌曲成功之處就是以Jason最拿手的情歌風格去感謝十年來身邊出現過的每一個人，把演唱會主題曲往往俗套和炒熱氣氛的風格改寫。好記得Jason曾在小編的《StarTalk》專訪中説過：「我唔駛你話俾我聽做得好唔好，我話俾你聽我做得好唔好啦！」人家默默努力唱歌十年，好歌多的是，支持者數目不斷，卻慘成「娛圈玩具論」中的主角，搞到攞個奬都可能有壓力，最終一句充滿人情味的得奬感言「就算獎項有幾重要，都唔及身邊同事重要」，反而令Jason得到雙贏局面，網民心中陳廣偉的位置依然不變！

第5位《Dear Jane - 哪裡只得我共你》
作曲：Howie@Dear Jane 作詞：陳詠謙 編曲：Dear Jane/關禮琛 監製：Howie@Dear Jane/關禮琛/Tim@Dear Jane

鍾情Punk Rock的Dear Jane，眼見最成功、最入屋、最賺錢還是他們的情歌系列，不得不從現實和喜愛中取捨。面對著外界評擊Band仔唱情歌之説，踏入2016年的Dear Jane一口氣打造「愛情三部曲」，承接三年前《不許你注定一人》的成功，第一章《哪裡只得我共你》由首奪作曲人獎的成員Howie創作，上架9個月獲得6百多萬點擊率成2016年點擊之王，三部曲合共千多萬點擊支持，呢個數字再一次證明Dear Jane唱情歌特別獲得樂迷受落。老實説，Band仔唱情歌何罪之有？更何況他們是做Rock歌起家，學Dear Jane話齋：「批評我地即係冇聽過我地啲歌！」識得玩呢埸遊戲嘅人，才是真正的大贏家。

第6位《JW王灝兒 - 矛盾一生》
作曲：林家謙 填詞：陳詠謙 編曲：周錫漢/黃兆銘 監製：周錫漢

初出道的JW，曾橫掃樂壇新人奬及一嘗金曲金獎滋味，可是好景不常，越行得前越跌得痛，在沒有舊老闆黎明的日子，JW反而更加能夠越過障礙，重新出發。跨年作品《矛盾一生》喺2016年絕對可以話係「完勝」！歌曲為JW帶來無限的榮譽，重上頒奬台獲十大歌曲外，更首次攀上女歌手三甲位置，歌曲喺網上嘅點擊率更突破一千萬，把沉寂的廣東樂壇帶出一點朝氣！不得不佩服填詞人陳詠謙作為一位男性，作為一個好爸爸，能夠寫出一首唱盡女生失戀心聲的佳作。不過最無奈的是歌曲於2015年年底派台，在於播放率上比其他作品較為蝕底，否則奬項數目不止於此！

第7位《黃劍文 - 尋找消失的過去》
作曲：周慧敏 填詞：林夕 編曲：Jim Ling 監製：舒文

相信黃劍文呢個名字對好多人嚟講都會覺得好陌生，如果話係唱《綠豆》嗰位應該會有些印象吧！唱遊過香港的街道，走遍17個國家30幾個城市做街頭表演的黃劍文，喺2016年得到一連兩首劇集歌曲，對一位獨立街頭表演者嚟講，的確帶來無比的新衝擊。能夠自家創作，亦有演奏樂器的才華，不過《尋找消失的過去》就交托俾上帝早已預備的好友周慧敏打造歌曲，簡單的樂章再配合林夕的歌詞，輕易觸動腦神經，無可否認電視劇歌曲較異常洗腦，不過對於歌曲只在劇中出現過一次的玩法，亦未嘗不可，豈碼不會令人有煩厭的感覺，而且一聽難忘，帶出絲絲入扣的畫面，感動人心。相信香港樂壇會是黃劍文唱遊歷程當中的一小站，接下來會否拿著結他走得更遠，看看他的彩數有幾高！

第8位《鄭欣宜 - 女神》
作曲：藍奕邦 作詞：黃偉文 編曲：何山/孔奕佳 監製：何山/藍奕邦

要數2016年大熱歌曲非《女神》莫屬，一首作品可以令鄭欣宜成票后大有因由。自年前欣宜大聲高呼《你瘦夠了嗎？》後，繼續行自我，你有你審美眼光，我有我做回自己，更得到民心。《女神》的降臨，打從「不要低頭，光環會掉下來」開始，再由藍奕邦譜上旋律，當中加插香港小姐配樂可見其心思，今倘黃偉文報恩成功，處心積慮20年落重藥為《女神》一曲注入生命，再由充滿傳奇的欣宜演繹更具說服力，配合MV題材等種種元素，輕易打造出真女神，把從前被人取笑，受盡世人目光的鄭欣宜變成如今脫胎換骨的Joyce。

第9位《泳兒 - 四不像》
作曲：Vincent Chow 作詞：林夕 編曲：Gary Tong 監製：梁榮駿

出道十年的泳兒，總是欠缺一個名份，一直被外間遺忘的她，唱得好又如何？其實泳兒每年也默默為香港樂壇出一分力，中期模糊的定位害得她成四不像，經過兩張翻唱發燒專輯的磨練，同時樂迷也餓了整整兩年後，泳兒回歸新歌懷抱，一曲《四不像》重新把泳兒帶回樂壇軌道。歌曲看似描述一個甘為不愛自己的人徹底奉獻，去爭取被對方喜愛的資格，如代入現實中的泳兒甘為音樂徹底付出，努力爭取業內和樂迷的認同更有感受。泳兒的聲線總是有一種古典和淒美的感覺，《四不像》的格調重拾昔日《感應》、《你我她》和《黛玉笑了》的情懷，再次感受泳兒的功力，令她重生。最可惜的是《四不像》在四張樂壇成績表上，竟然未獲任何肯定，落得如此下場，難免令人心灰。

第10位《許廷鏗 - 你在我在》
作曲：Howie@Dear Jane 作詞：陳詠謙 編曲：Dear Jane 監製：Howie@Dear Jane /關禮琛

2016年許廷鏗衝出重圍，跳出電視劇歌曲框框，三首非劇集上榜作品《阿樂》、《我的志願》和《你在我在》亦能交出水準。三個背後不同的故事，也持有同一股力量，就是為音樂而堅持和付出，Alfred努力捍衛只做音樂，亦堅持做自己喜歡的音樂，參與歌曲的程度比他人付出更多，從班底不斷求變可見其心思，經過Eric Kwok和林若寧，還有陳光榮和林夕的洗禮，到《你在我在》Dear Jane和陳詠謙的改造，今倘Alfred為樂迷帶來一些新鮮感。其實搖滾曲風對Alfred頗為合適，爆發力強，亦可大賣唱功，奈何歌曲反應未達預期。近年Alfred作品評價好壞參半，雖則「旁人在唾罵，旁人在笑話」，但只需要有心有力，一點都不怕。

白天的太子就如宿醉半夢的人兒。前一晚的醉生夢死，並不如中環的紙醉金迷，她不裝作優雅，只伴着平庸的老街坊、紅妝前的女郎、休更的司機、下班的三行工人、三五知己，豪氣乾杯。翌日酒氣未散，還是支撐半醒的身軀，承托着清晨的工作者，如此貼地、如此豪情。

這裏食肆雲集，但說到最有「佬味」的餐廳，要數這一間坐落於地鐵上蓋，轉角位置的老店。一名髮絲參白，嘴角有一顆毛痣的大叔，踏着急促的腳步來到店前，拉起鐵閘。閘上是一個老招牌，白底紅字刻上「志記海鮮飯店」，往門面一看，左邊是門口，門口之上熱情地寫上「歡迎光臨」，對出位置有幾個老舊的魚缸，裏面幾條大魚局促地蠕動着身體；右邊則是一個明檔，一名白髮半禿的老伯正在檔前舀飯。這二人是甥舅關係，亦是合夥多年的拍檔，經歷四十六個寒暑。如今拖着老軀，照舊開檔，醉翁之意豈在酒。


吃好
午時稍過，招呼過匆匆吃午飯的三行工人及閒來無事的老街坊後，老店的燈都半關。剛才擠身於明檔的老伯，略略收拾一下，就轉身走入陰暗的休息室。他叫「志叔」，顧名而知他就是小店的創辦人，看上去較為冷漠沉默。另一位於店門前擦着魚缸的毛痣大叔，人稱「棠哥」，是志叔的外甥仔。要聽舊故事，就得追着志叔的尾巴走。老人家邊耍手擰頭，又邊坐下來，準備好一個講故的模樣。

說起飯店，就要追溯至一九七三年尾。本來於九龍城擺檔的志叔，因為該區要拆卸而被迫搬遷。當時一個朋友於砵蘭街擺檔做雲吞麵，因為年紀大而找人頂下檔口，於是便找上了志叔。事實上，他人也挺風趣。問他為何不繼續做雲吞麵而改賣海鮮小菜，他直言不諱：「我邊識做雲吞麵？好鬼麻煩㗎做雲吞，咁炒小菜煮海鮮，兜兩兜就搞掂。」當時檔口以大牌檔形式經營，來光顧的都是熟客街坊，而且附近食肆不多，生意好做得多。後來，該區重建，志叔就到附近做冬菇亭，生意依然不錯，不少熟客都稍移腳步繼續光顧，後來因為牌照問題，輾轉就來到現址地鋪，當時是一九八五年，照舊炒小菜、賣海鮮，總之跟現在一樣，一直至今做了三十餘年。


事實上，棠哥在飯店只做了十多年，搬入鋪時他都還未是合夥人。嘴頭上說是簡單功夫，但事實當然不如此。至二零零二年，志叔已經六十有多，年紀大體力下降。當時棠哥在某大集團任廚子，他見外甥懂事又勤力，於是就問對方要不要加入，棠哥說做，就和他一起合作做了。他瞄瞄外面，見棠哥不在，他才開口讚外甥：「佢一直都係做呢一行，冇乜做唔掂㗎！做廚又得，做廳面又可以，總之就樣樣工作都會做。」除了功夫好，他最欣賞棠哥的勤力，甚麼都願意做，幾乎包辦店裏所有雜務。「喂，得未啊？」休息室內傳來粗獷的呼喝聲，原來所謂休息室，就是一眾廚子爭取於落場時間打麻雀作樂。志叔心神早已飄到麻雀枱上，擺擺手便起身離開。

還好，他着一位梳着飛機頭的師傅來應酬，他就是大廚「張師傅」，其實已經六十有多，在飯店工作很久。相傳店裏最聞名的炒糯米飯，就是由他創立。起初，飯店沒有賣糯米飯，入了鋪之後，雜誌常來取材，有一次，有傳媒要求師傅做生炒糯米飯給他們拍攝，於是便成了招牌菜式。所謂生炒，即只浸米，浸完的米落鑊生炒，一直炒到熟，最快都要二十分鐘，現實中根本不可能做到，故此最近這幾十年都是蒸熟飯炒。至於熟炒，首先將米浸幾小時後再蒸熟，蒸熟之後，攤開晾乾水分，飯會較爽身，炒的時候再用水焯。接着爆香臘味來炒，重點是掌握火候，放點心機下去，飯吃下去要軟糯有香味，滲着臘味的香味，香而不油又不黏口。如果是冬季，幾乎每一枱都叫上一碟。

此外，飯店的湯也是招牌，沒有甚麼技巧，真材實料，湯最重要是這樣。海鮮同樣沒甚麼秘訣，最緊要新鮮，如果客人食到不對辦的食物，以後都不會再來。師傅直言，海鮮沒以前賣那麼多，畢竟貴，現在吃小炒的多。還有一味招牌，就是雞。飯店用的，是每日的新鮮雞，都是用本港雞、活宰的雞。做法有沙薑雞、菜膽雞、葱油雞，雞質好的話就好食，冰鮮雞根本不能相比。望望室內，沒有棠哥的身影，外廳則傳出「沙沙」聲。

嘗鮮
收音機宣讀着時已過三，提醒着棠哥一天最忙的開始。對這一家飯店而言，午市只是過過日辰，晚市才是他們的重頭戲。故此，在晚市來臨前，他首先要到街市買菜，而且要走到大角咀一帶，貪其貨品新鮮。途中，他也滔滔不絕：「最辛苦嗰啲嘢，都係我做，喺嗰度做嘢，冇興趣就冇辦法做落去，我因為鍾意先肯勤力做。」的確，他每日過着死板又刻苦的生活。

每日下午兩時多回到飯店，清理一下店面後，接着趕去街市。這個街市，每一檔都是熟悉的臉。他先熟練地跑到菜檔買菜，再到肉檔買肉，基本上他走過去，每檔的老闆都留起了當日最新鮮的貨給他。唯獨是海鮮，他堅持左挑右揀，來到街尾的一檔魚檔，老闆直接將撈網丟給他，他就一個勁兒爬上最高的魚缸打撈出一條大斑，接下來的魚啊、蝦啊、蟹啊、蜆啊，他都細心選擇。他挽着六七大袋的貨物，又匆匆趕回店裏，邊走邊訴着苦：「日日攞住幾十斤四圍跑，隻手啊、條腰啊，都咪話唔痛！」

街市回來後，已經是一個多小時後的事。店面沒有半個人影。反倒是棠哥一點不怠慢。因為接下來要開檔，這是很麻煩的工作。所謂開檔，就是將是日新鮮海鮮放入發泡膠箱，攤放出明檔前，用以吸引客人。海鮮不是倒進箱子放水就好，而是需要打氧進去，棠哥表示若放點心機去養海鮮，就會比較耐養，畢竟海鮮的銷量很難掌握。

打烊後，他蹲在一箱大蝦跟前，挑出數隻死掉或長得不好的蝦丟掉，又解釋：「冇辦法㗎，死咗嘅冇人會吃，一睇就知道，煮出來嘅時候都係一睇就睇得出，呃唔到人！事實上，呃到我都唔會咁做，呃人個良心過意唔去。」食物不好吃的話，賺再多也沒有用，這也是他最自豪的地方，本着良心做人。倏地，見他皺了一下眉頭，原來被蝦刺到指頭，他隨即伸出雙手，又謂：「你睇我對手都係爆坼，始於呢啲濕手濕腳工作，有時抹嘢掂到洗潔精都不知幾痛！」最痛的，莫過於他因為以前斬東西斬斷的半個指頭，已成往事，反正現在不痛了，他倒覺得是閒事一樁。

說着做着，又等到收音機再一次報時，五時正，店內的員工原來已經圍在桌前吃晚飯。只有棠哥還未吃飯，也沒機會吃飯，他笑言打工更好，不過做習慣沒辦法，每天都是這樣，沒有停下來的時候。他寧願擋下了最辛苦的工作，始終做飲食不是個個願做，辛苦又不是說好賺。但這種老店總有一股人情味，員工和老闆之間就像朋友、像家人一樣，吃飯時笑聲不絕。做了那麼多年，大家的的合作溝通，之間的感情都很好，不少員工都顯老態，但仍揚言總之做得到都會繼續做。

談情
報時，六時正，飯店正式營業。棠哥有海鮮單就執海鮮，沒有單就招呼一下客人；志叔則忙於收銀、斬雞、煲飯。做完沒事做就坐在收銀處吹水。對他而言，最開心當然是有生意，他嘆說今晚生意也不是很好，估計十點鐘之後就沒有客人，假期會好一點。飯店的生客不多，熟客居多，有些一進來就叫聲「志記」或「志叔」，逗得老人家開懷：「開心，見到老相識點會唔開心。」說到感情，做了那麼久怎會沒有？堅持回來工作，可以說是捨不得，又是一種習慣，反正沒有去旅行就是回來鋪頭，這樣時間比較易過。只是，再開心也有退下來的一天。今年，他八十有三，差不多了，他嘆口氣：「冇理由七八十歲仲做㗎，我都做咗五十幾年，冇得話捨唔捨得，人老了可以做乜呢？畀外甥打理就得啦。」

基本上，現時店裏所有事務，由發薪水至到所有清潔衛生都是棠哥做，志叔壓根兒沒有理會，也從不會指指點點。問到棠哥有沒有信心保持舅父的金漆招牌，他眼裏有一點光芒：「盡心！攞個心出嚟做，一定做得到，你信我講！如果你肯攞個心嚟做，一定做得到。」重要事要重複，提醒自己，也警醒別人。

庸庸碌碌，或許就是生於俗世的宿命，在這片彈丸之土上，彷彿沒有主角，又，彷彿每位都是主角，醉翁，都各有其意。

採訪：黃寶琳
攝影：胡浩賢

新志記海鮮飯店
地址：太子運動場道1號地下
電話：2380 3768
營業時間：星期一至日11:30am-3pm，6pm-2am
詳情： http://bit.ly/2GYKaCp

一日之計，在旭日。

墨藍天空默默，靜候着晨暉到來，哈，真寫意，不如底下的一片昏黃。街燈有序，嗞嗞作聲地控訴着自己晝夜顛倒的工作，不似繁星亂綴，悠悠眨眼。也不止它們，石屎公路亦然，明明三更，卻還是熙熙攘攘，承受車輛不住地穿梭，月兒看着倒嘆美。也不是每位辛勤者都愛嗟怨，就如此刻於大道上馳騁的小貨車，靜謐地運載着車上的一老一嫩，也許是物似主人，司機座上的老人，臉上不帶半分煩躁，銀絲滿頭的他，比身旁尚留些許青絲的小伙子爽利得多，老人一雙銳目炯炯，跟他半皺的臉龐不太相襯；反倒小子眼臉圓潤，卻撐不起眼皮來，不住打瞌睡。

發叔，這是老人的稱號，一臉從容，一點料不到他正往骯髒之地去，上水屠房。他不是執刀的屠夫；也不是清潔大叔；更不是看更。他，是買賣牛雜的老行尊，這行業有一個略有耳聞的名號——執雜佬。身旁的阿漢，是發叔的兒子，如今父子倆正準備闖蕩他們每夜的老江湖，在朝陽趕至之前。


落日江湖
夜半路路亨通，小貨車已經抵達了屠房的閘口，阿漢猛地醒過來，雞手鴨腳地翻出往來屠房的通行證。閘口看更查證期間，平靜下來的小子，憶起這與他印象中小時候的屠房，很不同。小時候放假，做完功課沒事幹的他，就吵着要爸爸帶他到屠房玩，那年代嘛，很窮，沒有太多電子產品，對小朋友而言，屠房是一個樂地，因為到處是水，孩子玩水不畏濕身。當年，屠房的守衛沒有那麼緊張，基本車子上載甚麼人進去，都無人過問。「入得！」比發叔年輕得多的看更，把通行證看了幾遍，又點算車上人數，確保沒有外人才放行。還好，小子長大了，不再玩水。歲月神偷，總在十年廿載後，才東窗事發。唯獨是僅餘的這十來個逐臭之夫，依舊夜出早歸。

是的，這一行只餘十二人。行內年紀最大的發叔，五十多年來都堅持這樣的生活，凌晨一時許來到屠房作準備功夫，清潔﹑磨刀﹑磨剪。執雜佬在屠房內，都擁有自己的位置，做好準備，他們就靜候着屠夫宰掉一頭又一頭活牛後，把取下內臟運送到他們的位置。牛雜分成上雜及下雜，牛柏葉及牛雙連是上雜，由於價值較高，故肉食公司都會保留。至於執雜佬執到的，就是下雜，包括牛膀，即牛胰臟、牛腸、牛粉腸﹑牛肺、牛肚，即牛胃﹑牛脆骨，即牛氣管等。兩點半左右，接到牛雜後，先把內臟清洗乾淨，這個階段的牛雜，相當齷齪。牛畢竟是雜食，內臟廢物多，發叔形容這是一陣餿味，臭氣熏天，他邊洗擦着一大幅牛胃，邊講解原來吃不同飼料的牛隻，氣味會有所不同：「嗱，食草嘅牛呢，就冇咁臭；食粟米嗰啲就不得了。」尤其是牛胃，有糞便，甚至鐵釘﹑沙石，就連古幣他也見過。


他把另一幅小巧得多的牛胃交予阿漢清洗，這是牛沙瓜，牛胃的其中一部分，因為物罕而最搶手。接過沙瓜的阿漢不住調侃：「講句難聽，比一個未洗嘅公廁仲臭，不過細個成日嚟，慣咗陣味。」除了味道，最苦了人的，是工序，當中最花工夫就是洗牛腸。只見，發叔洗好牛胃後，就於放滿水的藍色水桶內，捏起一條牛腸，用鐵通串好，再從末端反方向拉往自己一方，就把牛腸內外反轉，要逐條通乾淨。他指牛腸油脂多，洗完大腸後，手心一陣肥膩，久久也洗不去。發叔沒有戴上手套，就這樣用手擠洗，他笑謂：「好多行家話唔戴手套，做耐咗手會唔好，我就做咗幾十年都唔戴，冇嘢啊，你睇幾滑。」把最後一條牛腸洗好，他伸出手來，着兒子幫忙把一桶桶的牛雜搬到車上。

屠房偌大，一路上，發叔滔滔未停。他說執雜這江湖很小，各行家都得遵循老行規。誰個每晚分配到多少牛雜，早已跟隨第一代而定，不能巧取，如遇缺貨，就只能高價向其他行家買入，但人家也不一定有多餘的可賣。至於他們提供予哪一家食肆，大抵是固定的，鮮會出現搶客的情況。然而，發叔最擔心兒子經驗不足，較死板，不會因應情況而增加或減少數量給客人，致牛雜分配不均。說着說着，二人已經來到停車處，協力把數桶子都抬入車尾之時，天色已成藏藍，把車子撻着，電子鐘顯示為凌晨五時，小貨車又再出動，送雜去。

日出而息
離開腥臊之地，這趟車去屯門，算是長途，由阿漢掌軚。執雜佬每日工作約莫七小時，五點離開屠房的話，大概七至八點送畢所有牛雜，可以回家休息。阿漢卻例外，下班後，他還要去當貨車司機，他苦笑：「冇計啦，有老婆有個女要養，呢一行又唔可以賺好多，咪要努力啲囉。」這勾起了發叔的刻苦歲月。

發叔本是澳門人，十八歲來香港，跟隨姐夫到牛棚工作而入行，成為了執雜佬。當時的牛棚比屠房更糟，無瓦遮頭，宰牛後於地下洗牛雜，又黑又血腥，起初他十分不習慣，但讀書少，打任何工都只能苦幹，反正當時這一行人工算是高一點，而且做生不如做熟，習慣習慣，就好。後來成家立室，更離不開這一行。至一九八六年，姐夫退休，於是便接手生意，半輩子，就這樣過去。

貨車終於停定，父子倆合力把藍桶卸下到小鐵車，往砂紅招牌的「新興麵家」推去，只見小店仍未開門，發叔就把東西放在門口，再往對出草叢處拿走一個空的大桶，就往車子走。這次換了發叔開車，阿漢則在一旁解說。他們現時共供貨予八間食肆，全都是合作多年的老字號，大家有固定的交收模式，甚至有店主把門匙交予他們，好讓他們夜半把牛雜放到店內。說到只供貨八間餐廳，發叔開着車也忍不住慨嘆，有些事，的確無可奈何。活牛由五豐行從大陸收購後，運來香港。他猶記得全盛時期，全港每日宰殺四百多頭牛，他最高峰一晚洗三十多副牛雜，是現時七至八副不能相比的。

如今，普遍認為吃內臟﹑吃紅肉不健康，不如舊時熱愛，活牛愈來愈少，每日只有四十來五十隻牛，牛雜供不應求，行家之間根本沒有機會競爭，縱有客人想買貨，大家也沒貨可交，很多食肆惟有買急凍貨。當然，也有尋鮮之人，故有些行家會取價高者得的策略，放棄出價較低的舊買家，改供貨予高價者。但發叔卻有他的堅持，只要老客戶仍然向他買牛雜，他就不會棄之不顧：「做耐咗，好多都變咗老友啦。」就如銅鑼灣「九記」，由現時事頭的父親單眼九當家那年代開始，發叔已經認識他爸爸，他吃吃地笑：「舊時單眼九同我老細買牛雜，我收工就去幫佢洗碗仔，搵外快嘛。」

說時遲，小貨車已來到中環，阿漢留下來看車，發叔則帶貨到「水記」，老闆水哥一見老朋友，就不住聊天，口水多過浪花。返回車子的途中，發叔仍然掩不住笑意，這一份情誼，是此刻坐於駕駛座上，等待着父親歸來的阿漢所不能理解的。噠一聲，貨車向最後一站——黃大仙駛去。抬頭，上方已是一片湛藍。

送走了最後一桶牛雜，父子二人坐於車尾邊緣回一回氣。發叔知道兒子孝順，這個行頭，兒子願意接手父親生意的，只有三人，他自覺幸運。今年年頭，阿漢因為眼見爸爸年紀開始大，始終這一行要勞力，半夜又辛苦，故回來幫忙。年輕人嘛，總有些少埋怨，畢竟執雜佬日夜顛倒，沒有假期，又請不到新人入行幫忙。現實歸現實，日日有牛雜分配予他們，不開工的話，牛雜拿去哪裏？這一行，很難回頭。老人淡然，深知這是心態上的調節，雖說厭惡，但執雜卻養活了這幫執雜佬，養大了他四個兒女。一旁的阿漢搭了搭爸爸的肩膀，道：「佢幾時冇力做，就正式接手，冇牛雜就冇我哋，佢一世人心血，會繼續做落去，做得幾耐得幾耐。」

人可真矛盾，很多執雜佬都嫌辛苦，只是，一旦退下來，沒有了寄託，不出三年就走了。發叔低首盯着石屎地，嘟嚷着：「唔想啊，唔想死啊。」卻不見頂上，赤烏正冉冉上升。
回首，一生之計，也在旭日。

採訪：黃寶琳
攝影：胡浩賢、謝本華
剪接：胡浩賢

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)

金粉灑落碧水之上，漁艇早已飄蕩至海中心，與點點燦光相融。岸邊是一條長廊，看了看錶，十時正，難怪晨運客已不見。這裏是鴨脷洲，從前不曉她，以為她是個如長洲般的偏遠小島，然而，她其實是港島南區的一個彈丸之地。步離海旁只有一條路徑，就是往中心的大街走。這大街啊，其實小巧筆直，坦率親切，兩三步一小店，五六步遇左鄰，如今有了利東站，多了外來人，更為熱情。
眼前正迎面走來一名略肥的婦人，臉上一抹燦笑，沿路跟不少途人寒暄着，大家都一句二句「貞姐」地喊。來到一道頗舊的鐵閘前，貞姐拉閘至半開，竄進店內。舉目一睹 ,淡青的招牌，左右各有六張食物的照片，中央夾着「金龍」兩個紅字，半點不別緻。然而，她的俗氣卻養活了足足四代人，雖庸猶貴。

穿閘而過，率先入目的是右方的粥檔，一個大鍋配一個小鍋，旁邊數個放配料的小膠盒空蕩蕩的；左方則是腸粉檔，冷冰冰的腸粉櫃旁邊，是一個沒有油的炸鍋。再往內走，玻璃面的方桌、圓桌數張，旁邊是天藍色膠櫈；密麻的菜單及照片掩去鏡面牆身；腳下踏着翡翠襯白的磁磚地，來到食廳盡頭的水吧，探頭一望，裏面還有一個明檔，看來是裝放糖水的。暗忖一切甚是老舊之時，貞姐早已身在廚房。


庸菜細煮
她是小店的第二代，自五年前接父母手後，就主力撐起小店。小店雖說下午四時才開鋪，但她每天十時就要回來做準備工夫。先是煲粥，小店賣的是生滾粥，所以特別注重粥底，洗好米後，下腐竹及柴魚到粥鍋內熬煮，貞姐接着邊把粥料洗切好備用，邊沾沾自喜地低喃着，自家的碎牛艇仔粥、及第粥、雞粥多麼好吃，但一切歸功於母親，「我媽媽識煮好多嘢，教我要用心煲粥，用心煮嘅就最好食。」她自言自己的廚藝，全都是媽媽教，在她心中，媽媽總是萬能的。備妥粥料，接下來的任務，就是煮糖水。主要先煲好中式糖水，如西米露、木瓜糖水、番薯糖水等，這些都是由媽媽作主的年代維持至今。說起往事，她倒滔滔。
小店雖只立廿七個年頭，但那個昔日則要從三十八年前說起。那時候的貞姐，年約十二，當時媽媽於工廠區推車仔檔，專賣中式糖水予附近的工人，她每天放學後來幫忙，自幼就有一手好廚藝。只是，車仔檔始終不穩妥，日日膽顫心驚。母女堅持十年，終於得一小店於利東邨街市，雖然只是外賣小店，但總比走鬼日子來得好。當時父親也協力顧店，果真是自家生意。貞姐畢業後，外出工作兩三年，就應母親的要求回店裏幫忙，她爽朗一笑：「佢希望我學她嘅手藝，唔係就冇人傳承啦。」一家人性子隨意，偶爾煮到好吃的，就想把菜式加入餐單，但做外賣畢竟有限制，結果於一九九一年，決定搬到地鋪。這家人是土生土長的鴨脷洲人，很多相熟街坊，對這地方感情最深，順理成章遷到此地，才有了現時的金龍。


明火正紅，幾個大鍋各自煮着糖水﹑白粥及例湯。說是茶餐廳，小店賣的食物卻雜得很。大汗淋璃的貞姐，轉身又埋頭開腸粉漿。只見，她小心翼翼地秤好材料：「一定要用磅，唔可以靠估，爭少少個味就唔同咗。」她口裏說着話，目光卻專注磅前數字。一切妥當，她接着開水，再把粉漿耐心搓至均勻，這樣才不會起粒，口感滑溜。將完成的腸粉漿拿到門口腸粉檔時，已經有客人在外等候，瞄了瞄牆鐘，噢，原來已經將近四時。她見狀立即把鐵閘打開，着這位兩手提重物的大嬸先進來坐坐，又匆匆跑進廚房，捧出一盤剛釀好的煎釀三寶到炸鍋旁邊，二話不說就丟到鍋裏去，看來是熟客。三寶於炸鍋內奔跳，乍看之下，明顯較坊間的大件，且塞滿自家手打魚肉，炸好排放於碟子上，淋上自製醬油，就端到客人面前，「今日食唔食腸粉？照舊翠瓜叉燒腸？」她熟稔地對大嬸說，見對方點頭，就準備跑到腸粉檔。怎料一轉身，一名頭戴鴨嘴帽的婦人已立於此，雖然把一頭短髮染了啡紅色，臉龐上的仍見歲月的痕迹，她正是貞媽。性格似乎比貞姐更爽朗，貞媽見人就開口道：「呢個腸粉櫃用咗廿幾年啦，係我大佬構思畫圖，再請人整，出面買唔到㗎！」這台機器是座地式，的確比平常的較大，厲害之處是由開檔到收檔都不用加水，以致速度及蒸氣更佳，火候好，做出來的腸粉方滑。試過有遊客每晚遊樂完畢，都來吃煎釀三寶及腸粉，吃足一星期，貞媽聞言搭訕：「梗係覺得滑啦，唔係都做唔到咁多年。」與其說她自信，倒不如說是自豪，雖自知這些食物只是粗菜，卻用心細做。貞姐自小就受到薰陶，對食物同樣充滿熱誠：「阿媽教落，自己擺得入口先好賣畀人。」五年前，父母因為腳疾而退休，由她接手小店，只偶爾到店裏幫忙，令她緊張不已。如今可保持着媽媽的水準，她已經滿足。傳承是孝德，一顆赤子之心，卻是難得。

情若瑰寶
天色漸見朦朧，一盞又一盞錯落的街燈陸續亮起。下午時間的客人多是吃些小點，或買外賣，加上父親也回來幫忙看鋪，貞姐就步進廚房去準備晚餐。為鍋子內的湯加鹽調味後，她徐徐步到廚房的後門，看着馬路的遠方，盼着甚麼似的。驀地，眸子被強光刺中，舉手一擋，回神之際，一輛貨車已經停泊於門前。引擎聲一下子消失，一名身穿間條衫的男人利落地跳下車子，往店裏走來。貞姐見狀，率先步回廚房，又着對方快點幫忙準備晚上的蒸餸。細看，二人樣子還真有幾分相似，她解畫：「呢個係我個仔昊賢，佢日頭做司機，黃昏返嚟幫我手做晚市。」說起兒子，她倒有些少愁色。一如當年她接手小店般，現時她同樣希望兒子可以接手，畢竟她已經五十歲，總有退下來的一天。只是，昊賢喜歡開車，自小已告訴貞姐，長大後要做司機，當時，她可是晴天霹靂，果然一直到長大後，仍然不變。對於這個事實，她也是理解的，年輕人喜歡自由，還沒定性，所以她也沒有強人所難。
終於到數年前，她的氣餒才令兒子決定回小店工作。當時父母退休，移居於大陸，不常到店內幫忙。有員工辭職，可是這飲食業啊，要招聘也不是容易事，員工不足，備菜﹑煮菜﹑樓面﹑洗碗，她只得硬撐。她皺着眉心，直言無助：「真係好辛苦，你睇我咁嘅身形，一日企咁多個鐘，對腳好痛。」腳痛得躲起來哭，又不敢讓人知道。終於有一天，她坦白跟兒子表示，打算把小店關了，不再做下去。昊賢這下子可緊張起來，一來得知媽媽的辛酸；二來不願看到兩代人的心血就此去，於是提出回來幫忙。他不諱言：「我梗係希望做全職司機啦，但唔想睇到媽媽咁辛苦，我見到金龍需要我多啲。」一旁的貞姐拍拍兒子肩膀，調侃他還有很多東西要學，而且還欠缺了一點熱心，強調這一行真的要用心去做。昊賢口裏唯唯諾諾，手則用力地炒着鑊，她看在眼內，心裏還是有點點欣慰。還盼，守得雲開月正明。

月兒亮，依舊擋不住漆黑。幸而，萬家燈火，照亮了一切。小店的星火很是溫馨，貞姐的弟弟及弟婦下班後也會到店裏幫忙。小店早已坐滿了熟客，甫坐下，人人送上例湯一大碗。貞姐一家人就坐於旁邊圓桌吃晚飯，期間不住與客人逗着趣。
大半輩子都守着金龍，並沒有賺過甚麼大錢，她說這是一個情意結，只希望有一個安穩的家，一家人想吃甚麼就能吃。對待客人亦然，因為自己有家庭，會關心是否有靚湯喝，這正正是這條街的人情味。「可以咁講，金龍係我哋一家人﹑所有街坊嘅聚腳點，呢個就係我辛苦咁耐嘅得着。」她眸子內反映了店子的一牆一磚，庸舊卻宛如瑰寶。

採訪：黃寶琳 拍攝：胡浩賢、謝本華

金龍茶餐廳
地址：鴨脷洲鴨脷洲大街124-126號
電話：2553 7363
營業時間：4pm-12am
詳情： http://bit.ly/2zBmf8o


===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)