［歐洲依然太多銀行，所以合併潮繼續］仲有就係，歐洲央行容許合併嘅收益去offset炒人閂分行嘅開支

原文：Many European countries still have too many banks（https://bityl.co/3a11）

TLDR：西班牙兩間銀行合併，會成為西班牙最大嘅銀行。另外瑞銀UBS同瑞士Credit Suisse又傾合併。歐洲傳統係極之多銀行，主要係政治原因，而長期盈利能力都極低。所以歐洲央行就行啲新會計制度鼓勵下佢地合併，重賞下果然有勇夫。

1. 近期歐洲，甚至全世界最大嘅一單合併，就在西班牙。兩間銀行合併，CaixaBank同Bankia。兩間都係馬交所（馬德里嘛）IBEX35指數成份股，你可以當中銀同恒生合併咁震憾，甚至更大—因為兩間銀行合併埋，會成為西班牙最大嘅銀行。

2. 而家最大嘅？桑坦德Santander，總部就在桑坦德！亦有英國業務。而家贊助西甲！但桑坦德隊波降班多年！第二大係BBVA，之前又係贊助西甲！在香港最出名就係同中信銀行很多關係。

3. 新一檔嘢叫咩名？未知，但我估又換個新名。你直覺可能估到，CaixaBank同Bankia呢兩個名都唔係好「西班牙」，亦冇乜歷史感。的確，兩間嘢歷史都唔長。兩間都係一大堆嘢重組出嚟，有啲似中銀（香港）由「十三行」（＊）組成咁。

4. CaixaBank，前身係巴塞羅那嘅一堆儲蓄銀行，十年歷史都未夠。又，加泰隆尼亞語嘅名，原本總部在巴塞，但因為巴塞玩公投，索性總部搬埋去巴倫西亞（即係華倫西亞，但聽聞地名就應該叫巴倫西亞）。CaixaBank在香港最出名，就因為老母Caixa Group一度係東亞銀行大股東，所以啲友話東亞「華資」，我都唔知點「華資」，華倫西亞資？（可惜冇乜人理解我呢句）

5. Bankia，仲煩，亦係一堆傳統嘅儲蓄銀行搞出嚟，包括最出名嘅Caja Madrid，同Caja Segovia（馬德里隔離，乳豬出名），都係嗰堆東西。2010先打包上市，2012年就已經出事要政府救。西班牙嘅嘢。而家仲係政府係大股東，今次合併後應該甩身啦？

6. 但想講，歐洲真係太多太多銀行啦，特別係歐洲大陸，特別係「浪漫語系」嗰堆。難聽啲講，都係政治黑暗，各據山頭，官政商勾結，有間銀行做私家雞，就控制好多嘢。合併？即係原本三個大佬得返一個，亦即係之前收買落嘅人分分鐘起身，點掂？所以唔係去到爆煲都唔多制的

7. 實情就係，歐洲嘅銀行盈利能力極低，太分散，冇規模經濟。分行數目又多，根本就唔需要。不過基於以上講嘅原因，佢地冇乜動力咁做，反正蝕錢又有政府救。

8. 點解而家最新又興玩合併？兩樣嘢，一來就又開始蝕錢，政府都救唔到咁多。二來更關鍵嘅，都係錢作怪。歐洲央行搞咗樣新嘅東西，叫做”badwill”—我都唔知中文點譯，反正Goodwill譯商譽都極之誤導（之前講過）（https://fbook.cc/3Fql）

9. Goodwill嘅嘢，太煩，但總之想像下你買間公司返嚟，佢帳面值係1億，即係資產減負債係1億，但你3億買返嚟。你吞咗佢1億，但你自己資產少咗3億，個Balance　sheet點算？就係整2億嘅「無形資產」攝住佢，最後每年慢慢踢走，當開支—大約係咁回事，同埋「品牌」根本完全無關。

10. 至於Badwill，其實即係Negative goodwill。帳面值1億嘅嘢，你半億買到返嚟，咪有呢啲咁東西。其實亦因為全球銀行股表現不滯，好多都係below book，市值低過帳面值—香港上市嘅好似得恒生同招商仲係above book 。

11. Negative good will 固然唔係歐央行發明，但而家佢地容許呢樣東西去對沖各式「重組成本」，炒人啦，關分行啦—不過不能走去派息。其實以前美國都試過。

12. 實驗證明，重賞下必有勇夫，之前意大利Intesa買UBI就係因為見有呢樣嘢而做，今次西班牙銀行世紀合併又係因為呢樣嘢。下一間？估係意大利嘅錫耶納銀行會畀人買起，Monte die Paschi，全世界最古老嘅銀行（呢間我都寫過）（https://fbook.cc/3Fqk）

13. 不過，暫時都係國內整合，跨境收購仲要啲時間。一個好重要嘅原因係：歐洲歐盟或歐元區，都係冇全歐洲嘅存款保險計劃，而家推緊，2025年啦

14. 仲有，最新鮮熱辣講緊，瑞士銀行UBS同瑞信Credit Suisse都會合併。之前都想，但監管機構似乎會阻。UBS 主席直頭話，唔批就搬去德國（https://bityl.co/3a0u）。幾時都話瑞士係德國一部份啦。又會係一單世紀大刁，不過，會炒萬幾兩萬人。

15. 又，香港呢？其實好少。固然過去十幾年唔少併購，但主要係外國買家買起香港銀行，星展買道亨，招商買永隆，越秀買創興，坡佬OCBC買永亨等等。香港銀行兩間合併？極少見—不過而家都唔係死剩好多間

16. 我見到嘅，反而係啲一早應該清理嘅寶號仲存在。例如之前講中銀「十三行」，其實唔使好老都知，南洋商業銀行同集友，以前都係中銀的，一路都係。但當年佢地冇併入埋中銀香港集團，冇換LOGO，主要因為早早有外國業務。原本以為遲早都中銀收返，點知兩間都係賣咗畀人。

17. 最後講講大家最鍾意嘅日本。日本嘛，真係乜春都鍾意三大。而家有三大銀行，但我入行時仲有四大。而家三大係瑞穗（Mizuho，其實好似一路都冇官方中文名），三井住友，三菱日聯。以前日聯（UFJ）係四大之一。而呢四大本身又係一堆嘢合併出嚟，不再細解。

（＊）講得出「十三行」都真係有返三十幾四十歲。有廣東省銀行（細個去過），新華（以前兆康有！），金城（細個見過！）。仲有最出名畀人打劫嘅寶生銀行！（＊＊）

（＊＊）寶生銀行就真係冇四十歲應該唔識。點解出名畀人打劫？問下阿媽應該知，集體回憶。又，有人以為何寶生係太子爺，都CLS。咁夏金城係咪金城銀行太子爺丫？王大陸係咪大陸銀行太子爺？

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7

——————————————————————————
［收費短片第九擊］美股科技股是否泡沫爆破？價值投資之選

課程資訊：https://homebloggerhk.com/course_detail/?code=CC009

內容:
*美股急跌點算好
*科技股係咪泡沫爆煲？
*有乜價值投資之選？

本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145

另外想買返第八擊（美國總統大選股票部署）都仲可以：https://bityl.co/3NPn

【#巴菲特大舉投資日本5大商社！】

股神巴菲特喊出投資5大綜合商社，且持股5%以上！除了讚嘆「巴菲特也太有錢了」之餘，究竟為何巴菲特會想買 #日本商社 的股票呢？

#投資一定有風險！＠＃＄％＾
--
植物肉吃過一次還會想再試？
葷素族群這樣看！
https://bit.ly/34Vlt6s

［東亞賣盤？我估係賣大陸業務］昨日間間銀行都跌，就係東亞唔跌，有啲嘢嘅。今日仲要升多一成幾。

（又，記得今日18:15睇直播）

1. 首先，我到而家都唔明，點解人人都仲叫東亞做華資，或者港資銀行。甚至鬼佬都仲叫佢係香港最後一間家族銀行。唔好講大生（係生，唔係新）咁極端，喂，即係當大新王守業冇到？

2. 好啦，你自己可以去望下，東亞嘅大股東，到底係乜水。基本上就係八國聯軍，日本仔三井住友，西班牙Caixa，馬來西亞國浩郭令燦，仲有美資對沖基金Elliott Capital。就係唔見港資。咁你勉強可以話郭令燦係「華資」，唔使分咁細。至於姓李嗰家，持股極少，仲要分散，應該都唔係一致行動。

3. 我同東亞真係相當多淵源，呼。首先我細個就住荃灣東亞花園。同東亞銀行應該冇乜關係，但樓下就真係有間東亞銀行！細個大人去，我又跟住去，就係我第一間參觀嘅銀行。

4. 打後，到我做分析員，睇銀行股嘛。時為美好嘅pre 雷曼年代，人人發中國夢，嘩，中國十鳩幾億人，一人買一對鞋，不撚得了呀。之類。For some reason，東亞在大陸嘅業務，非常咁勁。在大陸佢係可以同匯控花旗平起平坐。原因其實都好簡單，因為東亞李生就代表咗香港精神，英殖時佢咪紳士英國貴族，到換旗時佢投共又比任何人快。

5. 亦因為，東亞係其中一隻最早出業績嘅藍籌，所以我好記得。多數啲業績期，寫第一間我都仲有啲心機，去到最尾就變咗行屍走肉了。而東亞當年仲好似年年在Ritz Carlton（舊嗰間！即係而家AIA/CCB嗰度！唔係九龍站！）開，亦係少數會將分析員同記者撈埋一齊嘅公司。有啲分析員當然十分不高興，就梗係高級打工仔嘅傲慢覺得你班農民阻住大爺地球轉。本人就好樂意撈埋一齊，甚至我撈咗我以前女朋友返嚟，財經記者嘛。所以李國寶都算撮合咗我，雖然最後冇結婚。

6. 講開又講，李國寶當年都幾多花邊消息，唔止講咩佢對皮鞋之類，最大單都係內幕交易嗰壇嘢。咁東亞主持人已經講明係講業績唔講李生私人嘢，但記者理撚得你（都好似係好事），點會放過李國寶。但又講下李國寶真係冇乜咩架子，散場時就極速閃入電梯，同我一齊！冇話咩幾個大漢做保鏢咁。當年我仲記得啲記者追訪佢，結果打到我（啲記者好多架生嘛，特別係攝影或電視台）。呀寶哥哥仲同我say sorry！

7. 不過講到very sorry，不如都係講返個股價。再講一次，當時係美好嘅pre雷曼大中華膠年代，隻東亞一度股價六十蚊！你可以望下而家幾錢。而當年，美好嘅pre雷曼年代，本人都去對沖基金見工，有個年輕過我而又唔靚嘅小女孩煙我，咁循例指定動作都叫你pitch隻股票（其實即係畀冧把，用英文即時好似好pro）。我就講東亞，畀佢恥撚笑到我一楝都冇。事實亦真係如此。當然工亦係見不成。

8. 往後嘅事大家都知，東亞啲大陸業務就真係麻麻。特別近幾年香港反大陸嘅氣氛咁勁—但我想講，真係唔好將個焦點放在「進軍大陸冇運行」。實情其他外資行做得不錯，「主要係東亞自己嘅問題」。證據？你見佢香港都不見得做得好丫。股價盈利就係一切。

9. 然後仲有壇嘢。2014年我在耆英證券被炒，高人安排下幫我搵個地方安心立命，嗰間嘢（我有一期係返灣仔的）正係東亞下面嘅子公司。亦都所以啦喎，我當時都係東亞嘅員工。咁就大家明啦，你懂的。但畢竟我打佢工，佢又冇待薄我，我就所以到2020年先寫呢啲。雖然檔嘢其實冇耐賣咗畀台灣佬，亦都所以點解我又打過台灣佬工。BTW我做啲公司都幾興賣盤，耆英亦係我在位時賣畀馬拉佬的。所以我就由打兩份工變咗打四份工。

10. 東亞近年積弱云云，都不用我多講。咁多八國聯軍，有啲據說係李家啲朋友，但更多係來者不善。想狙擊佢又有，想買起佢（間公司啫，唔係佢條命）又有，想拆骨嘅又有，乜都有。總之我都好想知佢地嘅董事會係點開的。

11. 但，日本仔或者國浩西班牙嗰啲都唔講住。近幾年個焦點係美資Elliott。呢個擺明就係想拆咗李家個台，覺得佢經營不善，早賣早著。我純局外人角度睇，指控係應該成立的，始終股價就係一切。銀行經營係難，但你睇東亞啲股價，真係跑輸其他同業都好多。

12. 李家點玩？其實都係好簡單嘅一招，配新股畀啲疑似自己友（例如日本仔），然後攤薄Elliott嘅股權。咁都得？好似真係得的。所以唔好話供股賤，其實呢啲配股仲賤，你想跟都冇得跟。然後故事就係Elliott直頭告上法庭，話呢個行動損害股東利益云云。大約個故事係咁

13. 最新玩法係乜？你見到個股價咁升梗係有啲嘢。原來話東亞會做個Strategic Review，仲請咗高盛去做顧問報告。呢度就充滿聯想啦。

14. Strategic Review嘅嘢，最正常，不外乎睇下有邊啲唔掂嘅業務賣咗佢，或者有啲邊市場撤出咁。有人估話東亞賣盤，但我估唔係，照計賣盤就唔使搵人Strategic Review，大股東自己出面傾咪得。

15. 另外留意，今次呢個Strategic Review，係得到Elliott支持的。仲話會暫停個訴訟。講得白啲，大家都係求財，唔好累鬥累。東亞可能自知理虧定乜，或者想送走Elliott，咩都好。可能讓步，可能做啲嘢，令到幫到股價，咁Elliott賺錢咪走人。對沖基金嘅嘢，搵錢啫，真係同你run間銀行咩

16. 咁會係有乜搞作？我都冇乜細睇。但其實東亞之前都賣走過唔少嘢（包括我以前間公司，賣咗畀台灣佬）。真係仲要賣，而又夠大嘅，可能真係成檔大陸業務賣咗佢。畀第啲外資又好，畀中資又好（但我懷疑中資會唔會接，除非好平價）。
17. 即管又睇下之後發展係點。當然有人話可能係BEA Union藍十字，甚至馬來西亞Affin Bank之類，冇細睇，但，應該未大到Elliott滿意嘅地步吧。定或者係BEA Life？夠大未？