記一次陪女兒去牙科保健的經歷 文：子非魚 疫情關係，孩子的牙科保健讓家長們等了又等，究竟幾時可以排期去參加這個活動呢？ 終於，學校在暑假期前派了預約便條給正在讀小一的女兒，女兒興高采烈地問：「媽媽，係咪好似以前參觀牙齒學校咁㗎？有一副好大嘅牙齒，可以用大牙刷去刷，我好想再去呀！」 #30年前的牙科保健陰影 我心想：「少年，你太年輕了。」 這個牙科保健，是媽媽兒時的一個陰影，以至現在人到中年每一次去睇牙醫都像要去赴刑場似的…… 那時候的牙科保健是沒有家長陪同的。一進去一個又一個的「睇牙單位」，那股充滿消毒藥水的氣味、耳邊一陣又一陣怪嚇人的鑽孔聲音；口被撐得大大的、口水被一條又長又嘈的喉吸下吸下……簡直是震撼了當時天真爛漫的我！ 最緊張的關頭到了，牙醫說：「小朋友，你有蛀牙，而家要同你補牙。」沒有拒絕的能力，牙已補。就這樣，那股像是又燶又怪的味道直接輸入我的腦海，陰影就這樣伴隨到現在。 #走進心臟地帶 到了檢查那天，帶著女兒踏進等候大堂，自己不禁失笑想：「嘩，幾廿年都無咩變，都係嗰陣『徐』」。 姑娘叫咪：「ＸＸＸ！請到治療中心見醫生！」 我身體不由自主地彈起，企得筆直，阿女疑惑地望向我：「媽媽，你做咩呀？ 叫我個名呀，行啦！」 治療中心就是我腦海中那一個又一個的「睇牙單位」了，亦即是我與女兒踏進了我兒時陰影的心臟地帶了。 我的心跳無故地加速，鼻子又傳來那股消毒藥水味。嘩，好可怕呀！ 直至看到一位十分溫柔的牙醫哥哥時，突然又無咁緊張喇喎……忍不住望多兩望，口罩上是一雙粗眉大眼，成個許廷鏗咁。 #遇上一位溫柔的牙醫哥哥 牙醫哥哥帶我們到單位內，一邊用溫柔的聲線問：「小朋友，你讀咩學校呀？讀幾多年級呀？嚟，戴返個太陽眼鏡先，一陣好曬㗎！」 阿女都一一跟足指示，暫時未有異樣。 直到那枝「吱吱聲」的水喉開動時，阿女被撐得大大的口吐出一句：「媽媽，我有啲驚呀，睇完未呀？」其實，媽媽都好驚，驚上加驚。 男醫生又再溫柔地安慰：「你好叻喎，等我再檢查一下就OK啦！」 說時遲那時快，另一位高級醫生來到，風一般地來到坐下，三兩下手勢檢查一番，說了一兩句專業名詞，像風一般走了。 年輕牙醫望望我：「要補三隻牙。」 此時，阿女忽然流眼淚：「媽媽，係咪好痛㗎？」 年輕牙醫笑說：「邊個話你聽補牙好痛㗎？」 我附和：「係囉！唔痛㗎！好快咋嘛！」說完，覺得自己有啲離譜。 此時，另一個單位的小朋友正在發脾氣，死都不肯走上床檢查，家長又氹又鬧都不行，一個十分高大的醫護人員大聲說：「小朋友，你再咁唔講道理，我就趕你爸爸出去，等佢無得陪你。」爸爸的無奈與醫護人員的惡煞煞形成了強烈對比，小朋友最終沉默地走上床，一臉受刑的表情。我再望望許廷鏗，心想我們真幸運！ 一轉頭，小女檢查程序都完成得七七八八，醫生說：「再約個期來吧，下次我哋先補牙！你今日做得好好呀小朋友，下次都要咁叻呀！」 牙科保健完畢，我拖著阿女離開。我見阿女一直也超淡定，到收到補牙通知才怯場，問她：「其實你驚唔驚？」阿女點頭。 #重拾力量去……#睇牙 坐下吃午餐時，我決定一五一十地向阿女坦白，媽媽是多麼害怕去牙科保健。 阿女聽完，冷靜地回應：「媽媽，雖然係有少少驚，不過都唔係好痛嘅，唔使咁驚喎。哥哥姐姐都好好人，醫生哥哥仲讚我叻，希望下次返去補牙都會見返佢啦！」 唔知點解，我被呢個小學雞的勇氣感動到，一把年紀的我竟要個豆釘鼓勵返轉頭。 所幸今天的牙科保健服務變了許多，除了牙醫更年輕更友善，也感恩可讓父母同行，做娘親的我能陪伴在旁，握著她的小手，事後兩母女能討論分享大家對睇牙的感受，也是額外所得。 過了幾天，決定打一通電話：「ＸＸＸ醫生，我想預約睇牙。」 ＝＝＝＝＝＝ 作者：子非魚，前半個醫護界人員，理想工作與全職媽媽中間，不需擲毫決定，女兒穩勝。 #親子 #家長教育 #育兒 #教養 #港爸 #港媽 #父母 #家庭 #popa學問