當全世界都只講一種語言（上） . 如果你可以穿越，去任何一個時間點廿四小時，你會去邊？ . 考古？定去未來記吓六合彩同股票號碼？ . 拎住呢張上天所賜嘅「穿越一日遊券」，我選擇咗一千年後。 . 因為呢一場穿越，關乎我嘅未來，我嘅人生。 . ， 先講講我嘅背景，2050年，交通已經好方便，去世界各地做生意、返工返學都輕而易舉。 . 但即使交通方便，每去到一個新地方，都要花好多時間適應當地嘅語言。 . 學校有好多外地學生，咁上堂要用咩語言？又有無數紛爭。 . 於是，各國政府聯手，推出「地球語」，希望所有人都講同一種語言，咁咪唔會再有語言不通，亦唔使花咁多資源去學外語。 . ， 哼，講就好聽，分明係想消滅我哋嘅文化。 . 語言，唔止係溝通嘅工具，亦係文化嘅結晶，每個地方嘅語言都象徵...... . 無錯，我就係「保衛語言大聯盟」嘅中文總幹事，周圍辦講座、籌款，反對地球語嘅推行。 . ， 但我哋講得再多，都唔及一個政策。 . 各地政府將「地球語」改成公開試必修科，原本嘅「方言」唔再被考核， . 於是家長就只會教小朋友學地球語，哪怕佢哋自己都未識講，都會將小朋友送去地球語補習班。 . ， 政府、大公司嘅公文都用地球語，即係話，要搵份好工，必須學好地球語。 . 乜嘢「文化結晶」，只係我哋少數人嘅諗法， . 對於更多人黎講，學語言，都係為咗讀好書搵好工，講到尾，搵食啫。 . 講人話定鬼話，有咩分別？ . ， 於是，「保衛語言大聯盟」節節敗退。 . 我估，到我哋呢一代死晒之後，無人會再識講原本嘅中文啦。 . 我唔可以接受呢個結果，有幹事提出，話各國都有人想保衛自己嘅語言嘛，所以我哋應該同外國嘅聯盟合作，群起反抗。 . ， 呢個諗法好有道理，我哋好快就聯絡到各國嘅聯盟。 . 初時我哋好開心㗎，但合作計劃停滯不前，原因居然係，語言不通。 . 要保衛一種語言，就要講文化，要了解一種文化，絕對唔係識講「你好我好天氣好」就得。 . 一個人識中文英文，再加多種外語就好叻啦，有幾多人會識埋孟加拉話、阿拉伯話？ . ， 我哋無得揀，只好請翻譯，仲要請咗幾個。 . 呢個消息一傳出去，就俾支持地球語嘅人嘲笑， . 「好好地講地球語咪好囉，係都要搞到語言不通請翻譯嘅？」 . 「啲人唔想畀心機學地球語，咪話要保衛舊語言囉。如果佢哋咁叻，唔學埋其他語言，仲要請翻譯？」 . ， 而更雪上加霜嘅係，「保衛語言大聯盟」嘅副總幹事，我嘅副手，俾人揭發原來係開英文補習社嘅。 . 所有人都話，佢根本唔係想保衛語言，只係怕地球語通行後，無學生再搵佢補英文。 . 我望住身邊嘅拍檔，我開始懷疑每一個人，佢哋到底真係想捍衛文化，定只係為咗自己嘅私心？ . 我甚至開始懷疑，保衛每個國家嘅語言，真係好過地球語？ . 待續... . #短故 #短篇 #小說 #陳美濤 #廣東話 #粵語 #tomatochan #當全世界都只講一種語言