《無異之局》守護者之死（二） 雖然講就話「一陣見」，但自董炎離開後感覺已經過咗一段幾長嘅時間。一個鐘？兩個鐘？抑或更加多……喺無電話又無手錶嘅情況下，根本就唔知實際過咗幾耐。 「聰仔，我諗我哋今次都係凶多吉少㗎喇。」呢段期間一直喺牆另一邊數臭無二嘅熊哥終於得出呢個結論，「不如，你真係認真考慮下將罪名推去佢身上？」 呢句說話突然令我覺得好哽耳。 「我頭先聽到個肥佬講㗎……條友識得乜鬼記憶修改……你大可以扮真係中招……」 「我唔覺得會呃到佢……而且，你係認真嘅？」我試探性咁問。 「我都唔想認真，但家下係講緊生死呀，假如佢真係你所講咁犀利，就算攬晒上身都應該……」熊哥講講下突然停咗。 「應該咩？」 我正開始感到疑惑，突然有一張卡牌從牢房外面經鐵門底縫穿入嚟，唔洗一秒就飛到我面前，不偏不倚咁掂到我腳尖，本來綁住雙腳嘅繩隨即瞬間解開。雖然係咁，但我都未敢輕舉妄動，只係繼續坐喺原位…… 噠──下一秒輪到鐵門解鎖，然後緩緩打開。 「韋家聰，唔好發呆喇，我係嚟救你出去。」外面傳嚟一把陌生男聲，但我喺度完全望唔到佢嘅身影。 「你係邊個？」 「我冇時間答你呢個問題，你只可以選擇走，或者留喺度俾董炎慢慢折磨。」 聽到呢度，我內心馬上浮出一個答案，企起身用麻痺嘅雙腳慢慢行到門前。行出去嘅一刻其實係感到好大壓力，因為真係唔知外面嘅情況係點……最後我選擇伸個頭出去，左望右望，走廊居然係一個人都無。 「你要望嘅係地下……見唔見到一張細地圖？佢會教你點離開呢個地方。」 我彎低身執起，正如佢所講，係一張手掌大嘅牛皮紙，上面明確寫低咗我應該點行先可以搵到出口。 「唔洗擔心，想捉你嘅人而家都唔喺度，你要做嘅係要盡快離開結界……」 「嗯，」雖然唔知神秘人係點做到，但呢刻我只可以相信，「但我要救埋熊哥……」 「唔好浪費時間……你頭先唔係已經察覺到古怪咩？」 「你咁講係咩意思？」雖然我係咁問，但頭先……我的確係感到異樣。 以我對熊哥咁多年嘅認識，雖然佢把口係成日不饒人，但底裡都係一位相當有義氣嘅人，最多只會發下怨氣，根本唔會講出將罪名推俾無二呢啲說話。 「隔離房嗰個人根本唔係你堂哥，佢只係董炎抽取你記憶製造出嚟嘅假象，為咗方便佢進行下一步計劃。」 「我係有呢種感覺，但係……」 我實在唔敢博，好驚呢下一廂情願，會令我後悔終生──所以，我毫不猶豫咁打開旁邊牢房嘅門，而門亦無鎖到順利開啟…… 🔽 閱讀全文： https://www.patreon.com/posts/55505229